ИШИД террорчилик ташкилоти ўзининг Афғонистондаги қудратини сезиларли оширди. Бу ҳақда, Россия Ташқи ишлар вазирлиги Осиё департаменти директори Замир Кабуловга асосланиб, «РИА Новости» хабар бермоқда.
«Россия ИШИДнинг Афғонистонда пайдо бўлиши юзасидан биринчилардан бўлиб ўз хавотирларини билдирган эди. Сўнгги вақтларда Афғонистондаги ИШИД ўз қудратини анча оширди. Бизнинг ҳисоб-китобларимизга кўра, мамлакатдаги ИШИД жангарилари сони 10 мингдан ошган ҳамда бу рақам Ироқ ва Сурияда тажриба оширганлар ҳисобига ўсишда давом этмоқда», — деди Кабулов.
Россия ТИВ вакилининг алоҳида қайд этишича, Афғонистондаги ИШИД кучлари асосан мамлакат шимолида — Тожикистон ва Туркманистон билан чегарадош туманларда ўрнашган.
«Жўзжон ва Сарипул вилоятлари бизнинг алоҳида хавотирларимизга сабаб бўлмоқда, боиси яқинда у ердаги жангарилар орасида Жазоир ва Франция фуқаролари борлиги маълум бўлди. ИШИД Афғонистонни таянч базаси деб ҳисобламоқда ҳамда ўз таъсир доирасини ундан ташқарига ёймоқчи. Бу, энг аввало, Марказий Осиё мамлакатлари ва Россиянинг жанубий ҳудудларига жиддий таҳдид уйғотади», — дея қўшимча қилди Кабулов.
Изоҳ (0)