Instagram’даги @shashki_tshk саҳифасида 18 декабрь куни Олий Мажлис биноси олдидаги туннел бўйлаб қарама-қарши йўналишда ҳаракатланган автомобиль видеоси эълон қилинди. Видео қоидабузар автомобиль салонидан қўл телефонига олинган.
Instagram’даги саҳифа муаллифлари бу видеони «Камералар бу қоидабузарликни кўрганмикин?», деган изоҳ билан эълон қилган. Видеодаги ҳолат @shashki_tshk саҳифасида ҳам, кейинчалик Facebook’даги «Водители Ташкента (Drivers.uz)» гуруҳида ҳам фойдаланувчилар томонидан кескин танқид қилинган, қораланган.
Видеода ҳайдовчи автомобилни қарама-қарши қатнов қисми бўйлаб бошқариб бораётгани, шериклари унинг бу ҳаракатидан жазавага тушиб бақираётганига гувоҳ бўлиш мумкин. Видео охирида ҳайдовчи автомобилни шу ҳолда «Новза» метро бекатига қадар ҳайдаб бориш истагини билдирган (етиб борганми ёки йўқ — номаълум).
«Водители Ташкента (Drivers.uz)»да эълон қилинган видео остида 540 дан зиёд фикр қолдирилган бўлиб, уларнинг қарийб барчасида йигитларнинг ўзи ҳам, уларнинг бу қилмиши ҳам кескин танқид қилинган. «Бундайларнинг касрига бегуноҳ инсонлар ўлиб кетади. Уларни бутун умрга ҳайдовчилик ҳуқуқидан маҳрум қилиш керак!», — деб ёзган фойдаланувчилардан бири.
Бир қатор фойдаланувчилар ҳайдовчи ва унинг шериклари маст этувчи модда таъсирида бўлиши мумкинлигини тахмин қилган. Кўпчилик автомобиль ичида бўлган барчанинг шахсини аниқлаб, ота-оналарига қўшиб жавобгарликка тортиш зарурлигини қайд этган.
Муҳокамада қатнашган фойдаланувчилардан бирининг сўзларига кўра, бу йигитлар аллақачон қўлга олинган ва 15 суткалик маъмурий қамоққа жойлаштирилган (бу ахборот ҳозирча расман тасдиқлангани йўқ).
Маълумот учун, Маъмурий жавобгарлик тўғрисидаги кодекснинг 128-5-моддасига мувофиқ, ҳайдовчининг авария ҳолатини юзага келтириши, йўлнинг қарама-қарши ҳаракатланиш учун мўлжалланган томонига чиқиши энг кам иш ҳақининг 10 баравари (21 декабрь ҳолатига кўра — 1 722 400 сўм) миқдорида жарима билан жазоланади.
Қуйидаги ҳолатларда ҳайдовчи 15 суткагача маъмурий қамоқ билан жазоланиши мумкин:
- милиция ходимининг қонуний талабларини бажармаслик (худди шундай ҳуқуқбузарлик маъмурий жазо чораси қўлланилганидан кейин бир йил давомида такрор содир этилган бўлса);
- транспорт воситасини маст ҳолда ҳайдовчилик гувоҳномасисиз бошқариш;
- мастлиги ёки маст эмаслигини аниқлаш учун текширувдан ўтишдан бўйин товлаш;
- йўл-транспорт ҳодисаси юз берган жойдан кетиб қолиш.
Изоҳ (0)