2018 йил январь ойи ўрталарида АҚШнинг Скотсдейл шаҳрида раритет автомобиль — Mercedes-Benz 770K Grosser Offener Tourenwagen кимошди савдосига қўйилади. «Мотор»нинг ёзишича, 1939 йил октябридан 1941 йил майига қадар ундан Адольф Гитлер ўзининг парад автомобили сифатида фойдаланган.
Автомобильнинг ушбу нусхаси Гитлер учун махсус, айнан унинг ва ҳайдовчиси Эрих Кемпканинг талаб ва истакларига кўра тайёрланган. Хусусан, автомобилга қалинлиги 30 миллиметр бўлган ўқ ўтмас олд ойна ўрнатилган, салоннинг орқа томонида эса кўтариб ва тушириб қўйиш мумкин бўлган махсус ҳимоя сексияси бор.
Offener Tourenwagen атиги 203 дона нусхада ишлаб чиқарилган. Ҳозирда фақат бешта шундай автомобиль сақлаб қолинган бўлиб, уларнинг учтаси шахсий коллекцияларда сақланади. Ўз вақтида бундай автомобиллар Япония императори Хирохито, Норвегия қироли, шунингдек, диктаторлар Антониу ди Салазар ва Франсиско Франко ихтиёрида бўлган.
Автомобиль ҳажми 7,7 литр бўлган, саккиз цилиндри бир қатор жойлашган, қуввати 230 от кучига тенг двигатель билан таъминланган. Узатмалар қутиси — беш босқичли механика.
Гитлернинг «Мерседес»ини 1945 йилда Америка ҳарбийлари қўлга киритиб, АҚШга юборган. Машинанинг эгаси бир неча бор ўзгарган, кимошди савдоларига қўйилган. Хусусан, у Лас-Вегасдаги Imperial Palace казиноси коллекциясида бўлган ва ҳатто Чикаго музейида намойишга қўйилган.
Машина сотувидан тахминан қанча пул ишлаш режалаштирилаётгани маълум қилинмаган. Бироқ, тушган пулнинг камида 10 фоизи Холокост мавзуси билан шуғулланувчи жамоат ва таълим ташкилотлари ҳисобига ўтказиб берилади.
Изоҳ (0)