BMW компанияси яқин вақт ичида конвейердан чиқиши кутилаётган энг катта йўлтанламасининг илк суратларини эълон қилди. Суратларда АҚШнинг Спартанберг шаҳридаги заводда Х7 моделининг оммавий нусхадан аввалги версиясини йиғиш жараёни акс этган.
Сериялаб ишлаб чиқариш олдидан тайёрланган ушбу автомобиллар моделни омологация қилиш (такомиллаштириш), мураккаб иқлим шароитларида синовдан ўтказиш ҳамда модернизация қилинган конвейер линиясини текшириш учун фойдаланилади. Ушбу текширувлар тўлиқ якунига етганидан сўнггина компания сотув учун маҳсулот ишлаб чиқаришга рухсат беради — АҚШ автобозорида янги BMW Х7 лар келаси йил охирида пайдо бўлиши керак, деб ёзади «Мотор».
Суратларда йўлтанламас тўлиқ акс этмаган, шунга қарамай, у ташқи кўринишидан 2017 йил сентябрида Франкфурт автосалонида илк бор намойиш этилган Х7 iPerformance консепти билан деярли бир хил эканини кўриш мумкин.
Прототип — олти ўринли ва гибрид двигатель ўрнатилган беш метрли йўлтанламас эди. Унга лазер чироқлар, диагонали 12,3 дюймли электрон ускуналар панели, орқа ўриндиқдаги йўловчилар учун алоҳида мультимедиа мажмуаси ҳамда 23 дюймли ғилдираклар ўрнатилган.
BMW Х7 га, модификациясига қараб, компаниянинг бошқа моделлари орқали яхши таниш бўлган олти ва саккиз цилиндрли моторлар ўрнатилиши тахмин қилинмоқда. Гибрид двигатель «еттинчи серия»дан олинади — бу серия машиналаридаги моторлар 326 от кучига эга. Миш-мишларга кўра, бу йўлтанламаснинг V12 двигателли модификацияси ҳам чиқарилиши мумкин.
Изоҳ (0)