АҚШнинг Массачусетс штатида яшовчи 28 ёшли Дэвид Райт ИШИДни қўллаб-қувватлаш ва мамлакат ҳудудида терактлар режалаштиришда айбдор деб топилиб, 28 йил қамоқ жазосига ҳукм қилинди. Бу ҳақда «ТАСС» хабар бермоқда.
Райт умрбод қамоқ жазосига ҳукм қилиниши мумкин эди, бироқ Бостон суди унга нисбатан енгилроқ жазо тайинлади.
Терговга кўра, Райт, унинг тоғаси Усома Абдулла Раҳим ва шериклари Никита Ровински 2015 йили Техас штатида Муҳаммад пайғамбарга (с.а.в) карикатуралар намойиш этилган конференцияда иштирок этган Памела Геллерни «ўлдирмоқчи ва бошини танасидан жудо этмоқчи» бўлган. Аммо мазкур ҳужум амалга оширилмади.
Усома Абдулла Раҳим 2015 йили Бостонда полиция томонидан отиб ўлдирилди. Райтга қарши кўрсатма берган Никита Ровински айни пайтда суд ҳукмини кутмоқда. Прокуратура унга 15 йил қамоқ жазоси берилишини талаб қилди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)