Президент Шавкат Мирзиёев 19 декабрь куни Ўзбекистонга ташриф буюрган Туркия ҳамкорлик ва мувофиқлаштириш агентлиги (TIKA) президенти Сердар Чамни қабул қилди. Бу ҳақда ЎзА хабар бермоқда.
Ўзбекистон Президенти меҳмонни самимий қутлар экан, жорий йилнинг 25—26-октябр кунлари Туркияга амалга оширилган давлат ташрифи икки мамлакат ўртасидаги муносабатларни стратегик ҳамкорлик даражасига олиб чиққанини мамнуният билан таъкидлади.
Туркиялик ҳамкорлар билан биргаликда савдо, саноат, инвестиция, транспорт, туризм, соғлиқни сақлаш, таълим ва бошқа соҳаларда истиқболли дастур ва лойиҳалар амалга оширилаётгани ижобий баҳоланди.
Учрашувда TIKAнинг Ўзбекистондаги аолиятини янада кенгайтириш ва янги босқичга олиб чиқиш муҳимлиги қайд этилди.
Ўзбекистонда агентлик томонидан шу кунгача 23,6 миллион доллар миқдоридаги 700 га яқин грант лойиҳалари амалга оширилган.
Суҳбатда икки томонлама ҳамкорликнинг истиқболли йўналишларини белгилаб олиш, бу борада TIKAнинг Ўзбекистондаги фаолиятини аниқ лойиҳалар асосида ва тизимли равишда ривожлантириш зарурлиги алоҳида таъкидланди.
Бу борада «йўл харитаси»ни қисқа муддатда ишлаб чиқиб, уни амалга оширишга киришиш муҳимлиги, шу муносабат билан, иқтисодий, маданий, таълим, соғлиқни сақлаш, атроф-муҳитни муҳофаза қилиш, туризм ва ижтимоий аҳамиятга молик бошқа қатор соҳаларда амалга оширилаётган лойиҳа ва дастурлар ҳажмини бир неча баробар кўпайтириш бўйича келишиб олинди.
TIKA раҳбари Шавкат Мирзиёевга самимий қабул учун миннатдорлик билдирди ва Туркия президенти Ражаб Тоййиб Эрдўғон ҳамда ушбу мамлакат бош вазири Бинали Йилдиримнинг эзгу тилакларини етказди.
Сердар Чам Ўзбекистон Президенти томонидан илгари сурилган таклиф ва ташаббусларни тўлиқ қўллаб-қувватлашини, бу йўлда бор куч-ғайратини сафарбар этган ҳолда, уларни ҳаётга ўз вақтида ва самарали татбиқ этишга Туркия томони тайёр эканини билдирди.
Изоҳ (0)