АҚШ ҳукумати расман КХДРга WannaCry вирусидан фойдаланиб, катта кўламли киберҳужум уюштирганлик учун жавобгарликни юклади. Бу ҳақда АҚШ президенти Дональд Трампнинг ички хавфсизлик масалалари бўйича ёрдамчиси Том Боссерт ўз мақоласида маълум қилди, деб ёзади «ТАСС».
Унинг сўзларига кўра, «пухта текширувдан сўнг, АҚШ кенг кўламли WannaCry ҳужумини Шимолий Корея бўйнига қўяди». Бу борада Вашингтоннинг фикрига бошқа мамлакатлар ҳукуматлари ва хусусий компаниялар ҳам қўшилади, дейилади мақолада. «Бирлашган Қироллик ҳужумни Шимолий Корея бўйнига қўйди ва Американинг Microsoft компанияси ҳужум манбаси Шимолий Корея ҳукуматига алоқадор кибертузилмалар бўлганини аниқлади», — деди Трампнинг ёрдамчиси.
«Ҳужум кенг кўламли бўлиб, миллиардлаб молиявий талафотларга олиб келди, ва Шимолий Корея бунинг учун бевосита масъулдир», — деб ёзади у мақолада.
WannaCry шифрловчи вируси 74 та мамлакатдаги Windows операцион тизими ўрнатилган компьютерларга 12 май куни ҳужум қилган эди. У компьютерларни блоклаб қўйиб, унга киришни қайта тиклаш учун пул кўчириб ўтказишни талаб қилганди.
Изоҳ (0)