Орто-токой (Косонсой) сув омбори ҳудуди яқинида истиқомат қилган Ўзбекистон фуқароларидан ер солиғи суммаси 26 йил давомида тўпланиб, 1 миллиард сом (14,3 миллион доллар)дан зиёдни ташкил қилди. Бу ҳақда Жўқорғи Кенеш мажлисида «Бир Бол» фракциясидан депутат Исхоқ Пирматов айтиб ўтди, деб ёзади KNews.
У Қирғизистон қишлоқ хўжалиги вазири Нурбек Мурашевга юзланиб, Ўзбекистон ўз фуқаролари учун солиқ тўлаш-тўламаслиги билан қизиқди.
Вазир сув омбори ҳудудида 44 та уй қурилгани, у ерда Ўзбекистон фуқаролари яшаганини айтди. Унинг таъкидлашича, битим ратификация қилингач, ушбу оилалар Ўзбекистонга кўчиб ўтади.
Эслатиб ўтамиз, Қирғизистон ва Ўзбекистон ўртасида Орто-Токой сув омборидан фойдаланиш тўғрисидаги битим жорий йилнинг 6 октябрида, Қирғзистон собиқ президенти Алмазбек Атамбаевнинг Тошкентга уюштирган ташрифи вақтида имзоланган эди. Ушбу ҳужжатга мувофиқ, сув омборини муҳофаза қилиш ва бошқариш ҳуқуқи Қирғизистон томонига тўлиқ ўтди. Ўзбекистон эса ўз зиммасига сув омборининг ишлашини таъминлаш мажбуриятини олган.
Қирғизистон Республикаси Жўқорғи Кенешининг 13 декабрда бўлиб ўтган йиғилишида кун мавзуси сифатида «Қирғизистон ва Ўзбекистон ҳукуматлари ўртасида Жалолобод вилоятидаги жойлашган Орто-токой (Косонсой) сув омборидан давлатлараро фойдаланиш тўғрисидаги битимни ратификация қилиш» масаласи кўриб чиқилди.
Изоҳ (0)