Россия ва Хитой янги Миллий хавфсизлик стратегиясида АҚШ учун хавф туғдирувчи мамлакатлар қаторига киритилади. Бу ҳақда президент Дональд Трампнинг миллий хавфсизлик бўйича ёрдамчиси Герберт Макмастер айтиб ўтди, деб ёзади «ТАСС».
Унинг сўзларига кўра, Трамп янги стратегияни 18 декабрь куни эълон қилади. Унда АҚШ ва унинг манфаатларига нисбатан «глобал хавфлар», шу жумладан, Россия ва Хитой каби «ревизионистик авторитар давлатлар», Эрон ва КХДР каби «четлатиб қўйилган мамлакатлар» ва экстремистик гуруҳлар санаб ўтилади, деди Макмастер. «Бу таҳдидларнинг барчаси нодемократик мамлакатлар томонидан келтириб чиқарилмоқда», — деган фикрни айтди у.
Макмастернинг сўзларига кўра, Россия ва Хитой «халқаро тартиб ва барқарорликни барбод қилмоқда, ўз қўшниларининг суверен ҳуқуқлари ҳамда қонун устуворлигини эътибордан четда қолдирмоқда».
«Россия томонидан бўлаётган таҳдид янги турдаги урушларни, шу жумладан, кибервоситалар ва кўплаб доменлардан фойдаланган ҳолда, қўпорувчилик фаолияти, дезинформация ва тарғиботлар кампанияларини ўз ичига олади, булар жамиятда низони келтириб чиқариш, мамлакатларни бир-бири билан жанжаллаштириб қўйиш ва ишонч борасида тангликни келтириб чиқариш мақсадларида амалга оширилмоқда», — деди Макмастер.
Изоҳ (0)