Нью-Йорк судларидаги жиноятчилар пончиклар билан меҳмон қилинади

АҚШнинг Нью-Йорк шаҳри мэри Билл де Блазио шаҳар судидаги судланувчиларга сўровномада қатнашиш эвазига Dunkin’ Donuts емакхонасига 15 долларлик карта бериш ташаббусини илгари сурди, деб хабар беради Forum Daily.

Мазкур ташаббус майда ҳуқуқбузарликларни содир этган судланувчиларга нисбатан жорий этилади ва солиқ тўловчилар маблағлари ҳисобига молиялаштирилади.

Сўровномада судланувчилардан суд ва прокурор ишини ва ҳатто суд биносидаги ҳаво ҳароратига баҳо бериш сўралади.

Бу ҳуқуқбузарларни маълум хизмати ёки муросага келиши эвазига мукофотлаш бўйича биринчи ташаббус эмас. Масалан, Райшерс оролидаги қамоқхоналарда интизомли маҳбуслар пицца билан сийланади.

Мэрия шу тариқа ахлоқ тузатиш масканларида келишмовчилик ва шафқатсизлик даражасини пасайтиришга уринмоқда.

Шаҳар маъмуриятидаги манба де Блазионинг бу ташаббусини «аҳмоқлик» деб атади ва суд жараёнида майда ҳуқуқбузарликлар туфайли иштирок этиш ҳам «кулгили бўлиши керак эмаслигини» таъкидлади.

«Судланганлар бу ҳолатнинг яна қайтарилишини истамаслиги керак. Судда инсонларда яна чақирув қоғозини олиш истагини уйғотувчи ижобий тажриба бўлмаслиги керак», —дейди  шаҳар полициячиларидан бири.

Сўровномада иштирок этган бир неча айбланувчилар мукофотни инобатга олган ҳолда ундаги ҳамма 144 та саволга жавоб беришга қарши эмаслигини тан олган.