Миллионер бўлишга ҳозирча эришмаган бўлсангиз ҳам, ҳеч бўлмаганда миллионердек нонушта қилишингиз мумкин. Барча зарур маҳсулотлар ошхонангизда топилса керак.
Олимлар нонушта кун давомида овқатланишнинг энг муҳим қисми эканлиги тўғри ёки нотўғрилигини ҳал қилганича йўқ. Шунга қарамасдан, муваффақиятли инсонларнинг мутлақо кўпчилиги тиғиз графикларидан тонгги таом учун вақт ажратишга ҳаракат қилади, деб ёзади InsiderPro нашри.
Хўш, улар нонуштага нима тановул қилади?
Ричард Бренсон, Virgin Group асосчиси, тонгда мюсли ва мевали салатни афзал кўради. У ҳар доим оиласи билан нонушта қилишга интилади.
Popeyes бош директори Шэрил Бакельдернинг тонгги овқати у қаерда эканлигига боғлиқ: уйда янчилган буғдойдан бўтқа, саёҳатда эса бекон, қуймоқ ва тостларни маъқул кўради. Ва албатта қаҳва.
Қўшиқчи ва актёр Жастин Тимберлейк Bon Appetit нашрига тонгги машғулотларидан аввал қовурилган тухум, шунингдек, зиғир уни ва бодом мойидан вафли истеъмол қилишини ҳикоя қилади.
Twitter раҳбари Жек Дорсининг нонуштаси — соя қайлали икки дона қайнатилган тухум.
Chicago Tribune маълумотига кўра, АҚШ президенти Дональд Трамп тўқ тутадиган нонушталарни ёқтирмайди — бироқ баъзан беконли тухум билан тамадди қилиши мумкин. Fox News’га берган яна бир интервьюсида тўғри Айёва даласидан келтирилган маккажўхори бодроғини хуш кўришини маълум қилган. Бундан ташқари, унинг собиқ тансоқчиси Кит Шиллернинг сўзларига қараганда, баъзан унинг бошлиғи унга тухум билан МакМаффин келтиришни сўраган.
Ток-шоу бошловчиси Келли Рипа Live with Kelly and Ryan дастурини якунлагандан сўнг ёгурт ва гранола тановул қилади. Унгача эса қуюқ капучино ёки катта латте ичади.
Amazon раҳбари Жефф Безос охирги интервьюларидан бирида аввал нонуштага бир пачка Pillsbury печеньеси еганлиги, бироқ рафиқаси унинг таркибини ўқишни таклиф қилгандан сўнг бу одатдан воз кечганлигини маълум қилади. Бизнесмен тонгни оиласи билан ўтказишни афзал кўради ва бу пайтга иш бўйича учрашувлар тайинламайди.
Intuit бош директори Брэд Смит тонгги машғулотдан сўнг оқсилли коктейл ичади, шундан сўнг офисга йўл олади.
АҚШ президентининг қизи Иванка Трамп «MyMorningRoutine.com» нашрига оиласидаги одатий нонушта ҳақида ҳикоя қилади. Болалар зерикиб қолмаслиги учун улар мевали грек ёгурти ёки турли қўшимчалар, масалан, чиа уруғи, ўрмон мевалари, годжи мевалари, долчин, грек ёнғоғи ёки бодомли сули ёрмаси тановул қилади. Бундан ташқари, у нонуштадан сўнг лимонли сув ва қаҳва ичади.
Миллиардер ва Berkshire Hathaway раҳбари Уоррен Баффетт нонуштага нима тановул қилиши фонд бозоридаги вазиятга боғлиқ. Business Insider’нинг ёзишича, ҳар тонг унинг рафиқаси Астрид машинаси стакандонига майда пуллар солиб қўяди. Уоррен унда қанча йиғилганлигига қараб, 2,95 ёки 2,61 доллар, тухум ё пишлоқли МакМаффин ёки бирор-бир арзонроқ гамбургер харид қилиши мумкин. 3,17 долларга эса яйраши мумкин: бу пулга у тухум, бекон ва пишлоқли бисквит сотиб олади. Агар унинг ишлари жуда яхши кетаётган бўлса, у McDonald’s менюсидан қимматроқ нарса танлаши мумкин.
Microsoft асосчиси Билл Гейтс Betsy Lane ўрта мактаби талабаларига интервьюсида нонуштага қарсилдоқ шоколад шарчаларини ейишини маълум қилган, бироқ унинг рафиқаси Мелинда у одатда нонуштани ўтказиб юборишини таъкидлайди.
Google бош директори Сундар Пичай ҳар куни тонгда бир финжон чой ичишдек «жуда инглизча» одати борлигини маълум қилади. Бундан ташқари, у одатда қуймоқ ейди.
Германия канцлери Ангела Меркель доим турмуш ўртоғи кимё профессори Йоахим Зауэр билан нонушта қилади. У одатда овқатланиш давомида Меркелни сиёсий муаммолари ҳақида саволга тутади.
Tesla ва SpaceX раҳбари Илон Маск одатда нонушта қилмайди, бироқ тонгда овқатланишга вақти бўлса, бу одатда қуймоқ ва қаҳва бўлади.
Россия президенти Владимир Путин чошгоҳга яқин катта қуймоқ ёки бедана тухум билан катта косада бўтқа ва мевали шарбат тановул қилади. Newsweek’нинг маълум қилишича, маҳсулотлар унга мунтазам Патриарх Кирилл фермер хўжаликларидан юборилади. Нонуштадан сўнг Путин бир финжон қаҳва ичади.
Изоҳ (0)