Ироқ бош вазири ИШИДга қарши уруш якунига етганини эълон қилди

Ироқ бош вазири Ҳайдар ал-Ободий ИШИД террорчилик ташкилотига қарши уруш якунига етганини эълон қилди. Бу ҳақда Meduza хабар бермоқда.

«Бизнинг қўшинларимиз Сурия ва Ироқ чегарасини тўлиқ назорат остига олди, шу сабабли, мен ИШИДга қарши уруш якунига етганини эълон қиламан», — деди у.

Ироқ армиясидан маълум қилишларича, «мамлакатнинг барча ҳудудлари ИШИДнинг террорчи тўдаларидан озод этилган», дея хабар бермоқда Associated Press.

Аввалроқ, 6 декабрь куни Россия Бош штаби Суриядаги ИШИД террорчилари устидан тўлиқ ғалабага эришилгани ҳақида ҳисобот берган эди.

Бош штаб бошлиғи Валерий Герасимовнинг сўзларига кўра, «Сурия ҳудудидаги ИШИД тўдаларининг бари йўқ қилинган, ҳудуднинг ўзи террорчилардан озод этилган».

Мустақил манбалар на Ироқ ва на Сурияда ИШИД устидан тўлиқ ғалаба қозонилганини тасдиқлади. Сурия ва Ироқдаги жанговар ҳаракатларни кузатиб борувчи сайтлар ушбу хабар ёзилаётган вақтда Ироқ—Сурия чегарасидаги ҳудудни, шунингдек, Фрот дарёсидан ғарбдаги ерларни террорчилар назорати остида, деб кўрсатаётган эди.