Турк олимлари жорий йилнинг 21 июлида Туркиянинг жануби-ғарбий соҳилида содир бўлган зилзила оқибатларини ўрганиб чиқди. Маълум бўлишича, Бодрум курорт шаҳри Эгей денгизи томон тахминан 26 сантиметрга силжиган, деб хабар берди Hurriyet Daily News.
Ер ости силкиниши содир бўлган ҳудудни ўрганишда 11 нафар олим 20 та сунъий йўлдош станцияларидан фойдаланди. 6,6 магнитудаги зилзила оқибатида тектоник плиталарда юзага келган горизонтал ва вертикал силжиш мониторинг қилинди.
«Аниқланишича, Бодрумнинг жанубий қирғоғи ва Кос ороли (Греция) орасидаги 25 километр кенглик ва 65 километр узунликдаги денгиз остидаги ҳудудда ажралиш содир бўлган. Битта плита иккинчисидан узоқлашиб кетган. Одатда 50 йилда содир бўладиган ҳодиса 11 сония ичида амалга ошган», — деди Докуз Эйлюл номидаги университетнинг зилзила тадқиқот маркази раҳбари, профессор Ҳасан Сезбилир.
Эслатиб ўтамиз, 2017 йилнинг ёзида Туркиянинг жануби-ғарбий соҳилларида содир бўлган зилзила оқибатида минатақадаги авиарейслар маълум муддатга тўхтатилган эди.
Изоҳ (0)