Америкалик Майкл Вольф масжидга ҳужум қилиш ва уни булғашда айбланиб, 15 йилга қамоқ жазосига маҳкум қилинди, деб хабар берди Florida Today.
2016 йилнинг январида Майкл мачете (узунлиги 50 сантиметр келадиган пичоқ) ёрдамида Тайтусвилл шаҳридаги (Флорида штати) Ал-Мунин масжидининг ойналари ва бир нечта ёритгичларини синдирган. Шундан сўнг у кириш эшиги ёнига чўчқа гўштини ташлаб кетган.
Қонунбузарнинг ҳаракатлари кузатув камерасига ёзиб олинган ва полиция уни ҳеч қандай қийинчиликларсиз қўлга олишга муваффақ бўлган.
Вольф терговга ёрдам кўрсатиб, ўз айбини тан олган ва жиноятни нафрат сабабли амалга оширганини билдирган. Шу сабабли судланувчидан масжидга ўғриликка тушиш айблови олиб ташланган.
Майкл бунга қадар ўғрилик, гиёҳванд моддаларни ноқонуний сақлаш ва бошқа қонунбузарликлари учун бир неча бор қамоқда ўтириб чиққан.
Изоҳ (0)