Ўрта Чирчиқда 33 яшар эркак келинойисининг тақинчоқларини ўғирлади. У энди беш йилгача қамалиши мумкин

Ўртачирчиқ туман ИИБга 2 декабрь куни 1979 йилда туғилган Д.Б. ариза билан мурожаат қилди, дея хабар бермоқда Тошкент вилояти ИИБ матбуот хизмати.

Хабар беришларича, у ўз аризасида номаълум шахс, уйда ҳеч ким йўқлигидан фойдаланиб, калит танлаш йўли билан кириб, уйидан умумий нархи тахминан 1 800 000 сўм бўлган аёллар тилла узуги, бир жуфт тилла зираклари ва тилла браслетини ўғирлаганлигини маълум қилган.

Тезкор чора-тадбирлар натижасида ушбу жиноят жабрланувчининг қайинукаси — 1984 йилда туғилган Р.Б. томонидан содир этилгани аниқланиб, у ушланган.

Ушбу ҳолат юзасидан гумонланувчига нисбатан Жиноят Кодексининг 169-моддаси 2-қисми билан жиноят иши қўзғатилган. Маълумот учун, мазкур модда бўйича гумонланувчи беш йилгача озодликдан маҳрум этилиши мумкин.