Тошкент марказидаги Ҳамид Олимжон майдонига ўтган асрда ўрнатилган Ҳамид Олимжон ҳайкали Алишер Навоий номли Ўзбекистон миллий боғи ҳудудидаги Адиблар хиёбонига кўчди. Бу ҳақда Facebook’даги «Tashkent is under construction» гуруҳида фотохабар қолдирилган.
Фойдаланувчилардан бири бу воқеага: «Зулфия Ҳамид Олимжонни кутиб қолган эди», — дея муносабат билдирган.
Хабар беришларича, бундан аввалроқ шоира Зулфиянинг ҳайкали, икки ҳафта аввал эса адиб Ғафур Ғуломнинг ҳайкали дастлабки ўрнатилган жойидан Адиблар хиёбонига кўчирилган эди.
Миллий боғ ҳудудида Адиблар хиёбонини ташкил этиш ҳақидаги қарор Ўзбекистон Президенти Шавкат Мирзиёев томонидан 2017 йил 18 апрель куни имзоланган эди.
Қарорга мувофиқ, Ҳамид Олимжон, Ғафур Ғулом ва Зулфия ҳайкаллари Адиблар хиёбонига кўчирилиши, бундан ташқари Озод Шарафиддинов, Эркин Воҳидов, Абдулла Орипов, Муҳаммад Юсуф шарафига янги ҳайкаллар ўрнатилиши кўзда тутилган эди.
Қайд этиш жоиз, 1991 йили Миллий боғ ҳудудида шоир ва мутафаккир Алишер Навоийнинг ҳайкали барпо этилган. Кейинчалик боғнинг алоҳида бир қисмида Ўзбекистон халқ ёзувчилари Абдулла Қаҳҳор (2007), Ойбек (2010), Саид Аҳмад (2010) ва шоира Саида Зуннунова (2013) ҳайкаллари кетма-кет ўрнатилган.
Изоҳ (0)