Ўзбекистонда Тошкент шаҳри ҳудудини Тошкент вилояти туманлари ҳисобидан кенгайтириш бўйича ҳужжат тайёрланмоқда. Бу ҳақда «Kommersant.uz» хабар бермоқда.
Хабар беришларича, пойтахтни кенгайтириш зарурати шаҳарда йирик қурилиш лойиҳалари амалга оширилаётгани, шу муносабат билан бир қатор турар жой ва маъмурий бинолар бузилиши кўзда тутилгани билан боғлиқ.
«Янги ҳудудларни пойтахтга қўшиб олиш бу йўқотишлар ўрнини қоплаш имконини беради. Айни вақтда, Тошкент вилоятининг бир қатор туманлари аҳолиси пойтахт шаҳар пропискасини қўлга киритиши мумкин бўлади», — дейилади хабарда.
«Ваколатли давлат тузилмалари томонидан пойтахтга ёндош ҳудудлар ўрганиб чиқилган ва изчил инвентаризациядан ўтказилган. Шаҳарни бир неча — Қибрай, Янгийўл, Юқори Чирчиқ, Қуйи Чирчиқ, Зангиота ва Ўрта Чирчиқ туманлари йўналишида кенгайтириш таклиф қилинган», — деб ёзади «Kommersant.uz» ҳукуматдаги манбага асосланиб.
Манба сўзларига кўра, Тошкент қайси йўналиш бўйича ва вилоятнинг қайси туманлари ҳисобидан кенгайтирилишига ҳукумат ёки Президентнинг қарори билан аниқлик киритилади. Бироқ, унинг қайд этишича, бу ҳужжат айнан қачон имзоланиши ҳозирча номаълум.
Тошкент шаҳри ҳудуди яқин вақт ичида кенгайиши мумкин экани ҳақидаги хабарлар биринчи марта пайдо бўлаётгани йўқ. Ноябрь ойи охирида UZ24 нашри ўз манбасига асосланиб 2018 йилдан пойтахт ҳудуди 1,5 баробарга кенгайиши ҳақида хабар берган, сўнг бу хабарини ўчириб ташлаган эди.
Расмий идоралар бу каби хабарлар ва улар ортидан пайдо бўлган миш-мишларга ҳозирча ҳеч бир муносабат билдиргани йўқ.
Изоҳ (0)