«АМО ЗиЛ» ҳамда «Депо-ЗиЛ» компаниялари томонидан президент автомобили сифатида ишлаб чиқарилган «ЗиЛ-4112П» лимузини сотувга қўйилди. «Auto.ru»да машинанинг баҳоси 70 миллион рубль (1 180 000 доллар) этиб кўрсатилган. Ушбу автомобилни 2016 йилда ҳам сотишга ҳаракат қилишган. Ўшанда унинг нархи 1,2 миллион долларга тенг эди, деб хабар берди «Мотор».
Бу турдаги лимузинларни яратиш лойиҳаси «Монолит» деб номланган. 2012 йилнинг декабрида Владимир Путин ушбу машинани синовдан ўтказиб кўргани, бироқ лимузин унга ёқмагани маълум бўлганди.
Ушбу машина «41047» лимузинининг базасида яратилган. «Мотолит» моделидан фақатгина эшик очгичлар ва капот қолган, халос. Шу билан бирга «4112П»нинг ғилдирак базалари кенгайтирилган: ўқлар орасидаги масофа 200 миллиметрга ошган. Лимузиннинг олтита эшиги ва олтита ўриндиғи бор.
«Монолит» 400 от кучига эга 7,7 литр сиғимли V8 двигатели ёрдамида ҳаракатланади ва беш поғонали автоматик узатмалар қутиси ёрдамида бошқарилади.
Эълон муаллифининг ёзишича, автомобиль зирҳланмаган, бироқ унга зирҳли капсула ўрнатиш мумкин.
Изоҳ (0)