Аукционлар тарихидаги энг қимматбаҳо картинани Саудия шаҳзодаси сотиб олган

Christie’s кимошди савдосида рекорд даражадаги 450 миллион долларга сотилган Леонардо да Винчининг «Дунё халоскори» картинасини Саудия шаҳзодаси Бадир бин Абдулла бин Муҳаммад бин Фарҳон ал-Сауд сотиб олган. Бу ҳақда шаҳзоданинг аукцион уйи билан ёзишмасига таяниб, The New York Times хабар берди, деб ёзади Meduza.

Нашр қайд этишича, қироллик оиласи аъзосининг исм-шарифи шунчалик нотаниш бўлганки, Christie’s вакиллари 100 миллион долларлик депозитдан кейин шаҳзодадан пулни қаердан олганига аниқлик киритишини сўраган. У кўчмас мулк билан боғлиқ ишидан даромад олганини айтган.

Шу билан бирга ал-Саудни рекорд даражадаги харид арафасида коррупцияга қарши кураш кучайтирилганини эълон қилган валиаҳд шаҳзода Муҳаммад бин Салмоннинг дўсти ва тарафдори деб айтишмоқда.

Абу-Дабида очилган Лувр музейи энди «Дунё халоскори» у ерда кўргазмага қўйилишини маълум қилишди.