ЎФФ мухлисларнинг стадионга югуриб тушишини, уларнинг «Локомотив»ни табрикламоқчи бўлгани билан изоҳлади

«Бунёдкор» ва «Локомотив» клублари ўртасидаги Ўзбекистон Кубогининг финали борасида ЎФФ баёнот берди.

Баёнотда айтилишича, кубок финалида 34 минг ишқибоз учун мўлжалланган «Бунёдкор» стадиони тўлиб-тошган. Бу ҳолат ўзбек футболига бўлган қизиқиш яна ортаётганидан дарак беради. Қолаверса, ЎФФ ҳам тарихда илк бор кубок финали олдидан шоу уюштиргани ҳамда ҳақиқий байрам ташкил қилгани таъкидланган.

Тақдирлаш маросими олдидан бир қатор футбол ишқибозлари майдонга ёпирилиб тушганди. Ташкилот бу ҳолатни қуйидагича изоҳлади: «Мухлисларни стадионда хурсанд қилиш мақсадида ЎФФ томонидан копток ва шарфлар совға тариқасида тарқатилди. Мухлисларнинг эмоцияларга берилиб, ўйин якунига етганидан сўнг «Локомотив» клуби футболчиларини табриклаш мақсадида майдонга чиқиб кетиши каби вазиятлар футболи ривожланган давлатларда ҳам учраб турадиган ҳолат ҳисобланади».

Кубок финалидан кейин мухлислар текин тўп илинжида «Бунёдкор» майдонига ёппасига тушиб кетди (видео)

ПФЛ бош директори Ўзбекистон Кубогининг финалини шоу тарзида ўтказиш қарорига бежиз келмаган. 25 ноябрь куни Омон Ғофуров Осиё Чемпионлар Лигасининг Японияда ўтган финал беллашувини стадиондан кузатган ҳамда нуфузли мусобақани қандай ўтказиш кераклиги борасида тажриба тўплаган. Кейинроқ бу ишни у Ўзбекистон Кубоги финалига татбиқ қилган.

Видео: «Бунёдкор» стадиони олдидаги минглаб мухлислар

Финал учрашувини стадиондан кузатган ОФК президенти Шайх Салмон футболдан катта таассурот олган ва мамлакатда мухлисларнинг футболга қизиқиши юқори эканини таъкидлаган. Ўзбекистон Футбол Федерацияси келаси мавсумдаги учрашувларни ҳам кўтаринки кайфиятда, ҳақиқий байрам тарзида ўтказиб, футбол мухлисларини хурсанд қилиш йўлидаги саъй-ҳаракатларини давом эттиради, деб баёнотга якун ясалган ҳамда мухлислар стадионга чорлаб қолинган.