Google компанияси 6 декабрдан бошлаб Android 8.1 операцион тизимининг янгиланиши билан бирга, унинг енгиллаштирилган Android (Gо Edition) талқини ишга туширилишини маълум қилди. Янги талқин бошланғич даражадаги қурилмаларда ишлайди, деб ёзмоқда TJournal.
Go Edition талқинининг ўзига хосликлари икки баравар кам жой эгалловчи енгиллаштирилган дастурлар бўлади. Мазкур дастурлар туфайли 512 мегабайтдан бир гигабайтгача бўлган оператив хотирага эга қурилмаларнинг соҳиблари Android’нинг янги талқинидан фойдалана олади.
Янгиланган дастурлар қаторига Google Go қидирув хизмати, Google Assistant овозли ёрдамчиси ва Gboard клавиатураси, шунингдек, Files Gо каби Google хизматлари киради.
Google’нинг расмий дастурларидан ташқари, Android (Gо Edition) бошқа дастурларни ҳам қабул қилади. Енгиллаштирилган дастурлар рўйхати Google Play Store виртуал дастурлар дўконида автоматик равишда пайдо бўлади.
Google вакилларининг сўзларига кўра, компания Gо Edition ёрдамида Android тизимидаги фойдаланувчилар сонини бир ярим баравар оширишни кўзламоқда. 2017 йилнинг сўнгига келиб, сайёрадаги Android’га уланган қурилмалар сони икки миллиарддан ошган.
Изоҳ (0)