Осиё Футбол Конфедерацияси президенти сифатида фаолият олиб бораётган Шайх Салмон бин Иброҳим Ал-Ҳалифа ЎФФ таклифига кўра Тошкентга етиб келди. Бу ҳақда ташкилот матбуот хизмати хабар берди.
Шайх Салмоннинг пойтахтга ташрифи аввалдан маълум бўлиб, ЎФФ унинг келиши шарафига Ўзбекистон Кубогининг финал учрашувини 4 декабрга қолдирганди. Бугун мартабали меҳмон «Бунёдкор» стадионига ташриф буюриб, учрашувни бевосита кузатиб боради.
Тошкент халқаро аэропортида Шайх Салмонни ЎФФ президенти Умид Аҳмаджоновнинг ўзи кутиб олди. Унга Спорт Қўмитаси раиси Рустам Қурбонов ҳамроҳлик қилди.
Ташрифи давомида ОФК президенти Ўзбекистон футболи билан яқиндан танишиб, амалга оширилган ўзгаришларни кўздан кечиради. Бу ҳолат ОФК ҳамда ЎФФ ўртасидаги алоқаларни янада мустаҳкамлайди, деб ёзилган ташкилот расмий сайтида.
ЎФФ президенти Умид Аҳмаджонов бунга қадар ФИФА президенти Жанни Инфантино билан учрашган, кейинроқ БАА, Қатар, Жанубий Корея ва Япония каби мамлакатларга ташриф буюрганди. Эндиликда Аҳмаджонов илк бор қитъа футболи раҳбарини Тошкентнинг ўзида кутиб олмоқда.
Изоҳ (0)