Тошкент шаҳридаги Инҳа университетида 29 ноябрь куни Open Data Challenge иловаларни очиқ маълумотлардан фойдаланган ҳолда ишлаб чиқиш бўйича танловининг расмий очилиш маросими бўлиб ўтди. Бу ҳақда университет матбуот хизмати хабар берди.
Танлов Ахборот технологиялари ва коммуникацияларини ривожлантириш вазирлиги, Тошкент шаҳридаги Инҳа университети, Ўзбекистондаги БМТТД ваколатхонаси, Буюк Британиянинг Ўзбекистондаги элчихонаси, Ўзбекистон Ёшлар иттифоқи, «Электрон ҳукумат» тизимини ривожлантириш маркази ва Uzinfocom томонидан ташкил этилди.
Open Data Challenge — очиқ ҳукумат маълумотларига асосланган маҳсулотларни тез ишлаб чиқиш бўйича мусобақа бўлиб, у Ўзбекистон учун нисбатан янги бўлган очиқ маълумотлар ғоясини тарғиб этишга қаратилган.
Open Data Challenge хакатони 30 ноябрдан 3 декабргача икки босқичда бўлиб ўтади. 30 ноябрь ва 1 декабрь кунлари рўйхатдан ўтган 400 дан зиёд иштирокчилар маҳорат мактаблари ва семинарларда иштирок этади. Ушбу тадбирлар давомида иштирокчилар малакали мутахассислар дизайн-фикрлаш, жамоаларни шакллантириш, Python тили асосида маълумотларни таҳлил этиш, Lean Startup ва Customer Development методологияси, блокчейн ва бошқа йўналишлар бўйича билимларга эга бўлади.
Танлов ғолибларини тақдирлаш маросими 16 декабрь куни бўлиб ўтади.
Изоҳ (0)