Россия федерацияси кенгаши «Ўзбекистон Республикаси ҳукумати ва Россия федерацияси ҳукумати ўртасидаги Ўзбекистон Республикаси фуқароларини Россия ҳудудида вақтинчалик меҳнат фаолиятини ташкил этиш учун саралаш ва жалб этиш тўғрисидаги келишувни ратификация қилиш тўғрисида»ги қонунни маъқуллади. Бу ҳақда UzDaily хабар бермоқда.
Келишувда хорижий ишчи кучини олдиндан саралаш, текшириш ва меҳнат муҳожирларини Россиядаги меҳнат фаолиятига тайёрлаш усулини маъқуллаш кўзда тутилган.
Саралаш ва текшириш жараёни Ўзбекистон томонидан амалга оширилади.
Келишувда муҳожирларнинг ижтимоий ва нафақа суғуртаси ва улар билан меҳнат шартномалари тузилиши ҳам кўзда тутилган.
Келишувга кўра, Россия меҳнат вазирлиги хорижий ишчи кучига эҳтиёж сезаётган иш берувчилар рўйхати, бўш иш ўринлари ва иш шароити ҳақида маълумотлар эълон қилади.
Келишувнинг амалга татбиқ этилиши ташқи меҳнат миграцияси соҳасидаги Ўзбекистон — Россия ҳамкорлигининг мустаҳкамланишига, икки давлат ўртасидаги дўстлик муносабатларининг ривожланишига, ишчи кучининг малакасини оширишга ва Ўзбекистон фуқароларининг Россия ҳудудидаги ноқонуний меҳнат фаолиятига жалб этилишининг олдини олишга олиб келади.
Изоҳ (0)