Ойбек Кападзе ва Раъно Шодиева PROlogue – 2017 сараланувчиларининг камчиликлари ҳақида гапирди

27–30 ноябрь кунлари Ўзбекистон ёшлар иттифоқи, «Ўзбеккино» миллий агентлиги, Ёш киноижодкорлар кенгаши, Кинематографияни ривожлантириш маркази томонидан PROlogue — ёш киноижодкорлар томонидан суратга олинган қисқа метражли фильмлар III Республика фестивали ташкил этилмоқда.

Фестиваль доирасидаги тадбирлар ҳақида ОАВ вакилларига тўлиқ маълумот бериш мақсадида 24 ноябрь куни Ўзбекистон ёшлар иттифоқининг Ёшлар пресс-клуби залида матбуот анжумани ташкил этилди. Матбуот анжуманида журналист Феруз Муҳаммад ҳам иштирок этди.

Матбуот анжуманида «Ўзбеккино» бош директори Фурқат Зокиров, Ёшлар иттифоқи Марказий кенгаши раиси ўринбосари Камолиддин Бекназаров, Ёш киноижодкорлар кенгаши раиси Ойбек Абдушукуров, киношунос Ойбек Кападзе, Ўзбекистонда хизмат кўрсатган актриса Раъно Шодиева иштирок этиб, фестивалнинг аҳамияти, сараланган фильмлар бадиий савияси ҳақида гапирди.

Жумладан, Ойбек Кападзе, Раъно Шодиева бу йилги PROlogue учун танлаб олинган фильмлар орасида халқаро фестивалларда ҳам иштирок этишга муносиблари борлигини айтди. Шунингдек, баъзи киноижодкорларнинг ўта савиясиз фильмларни ҳам фестиваль саралаш комиссиясига тақдим этганини ҳам айтиб ўтди ҳамда ёшларга кино асарларини топширишдан аввал бадиий раҳбарлар билан ишлаш кераклигини маслаҳат берди.

Саралаш комиссияси аъзоси Раъно Шодиевага PROlogue’да илк марта жорий қилинган «Энг яхши актёр», «Энг яхши актриса» номига муносиблар талайгина эканлигини, ёш иқтидор эгаларини кашф қилишдан қўрқмаслик лозимлиги ҳақида алоҳида тўхталиб ўтди.

Матбуот анжуманида бу йилги фестивалнинг илк бор Ёшлар иттифоқи томонидан ташкил этилаётгани ҳам таъкидланди.

Бугунги кунда хорижий мамлакатда истиқомат қилувчи ўзбекистонлик таниқли режиссёр Али Ҳамроев матбуот анжуманида шундай деди:

«Ёшлар, сиз агар 30 дан ошган бўлсангиз, ўзингизни ёшман деманг, ёш режиссёр бу менимча 20-22 ёш. Шунинг учун ёшман деб ўтирмасдан, тезроқ энг яхши асарларингизни яратишга киришинг».

Ёш киноижодкорлар кенгаши раиси Ойбек Абдушукуров Али Ҳамраевга жавобан қуйидаги фикрни билдириб ўтди:

«Ҳақиқатан ҳам, биз бугунгача севиб томоша қиладиган ‘Маҳаллада дув-дув’ каби фильмларимизни устоз санъаткорларимиз 30 ёшгача бўлган даврларида суратга олган. Демак, бугунги ёш киноижодкорларимиз ҳам тезроқ ўз устиларида ишлаб, яхши киноасарларини яратишлари зарур».

Матбуот анжуманида ОАВ вакиллари дастур доирасида барча саволларига жавоб олди.