Америкаликлар йўлда қолиб кетган қизни қутқарган уйсиз учун 370 минг доллар хайрия қилди

Америкаликлар бензини тугаб қолиб, йўлда қолиб кетган қизга бор пулини берган уйсиз киши учун 370 минг доллар хайрия қилди, деб хабар беради «ТАСС».

Бу воқеа Нью-Жерсида яшовчи 27 ёшли Кейт Макклюрнинг саъй-ҳаракатлари туфайли оммага маълум бўлди. Бир неча ой аввал Филадельфияга (Пенсильвания штати) кираверишда қизнинг автомобилидаги бензин тугаб қолди. Ҳодиса кечқурун юз бергани учун Макклюр йўл четида ёлғиз ва пулсиз қолиб кетди. Шунда қиз яқин орадаги автомобилга ёнилғи қуйиш шохобчасигача пиёда боришга ва бир канистр бензин сотиб олишга қарор қилди.

У ўз йўлида осма кўприк остида ухлаётган 34 ёшли уйсиз Жонни Боббиттни учратди. Боббитт Макклюрдан орқасига қайтиб, машина ичида ўтиришни ва ҳар эҳтимолга қарши автомобилни ичидан қулфлаб олишни сўрайди. Ўзи эса автомобилга ёнилғи қуйиш шохобчасига бориб, ёнидаги 20 долларга бензин сотиб олди.

«Мен ўзим билан юз бераётган воқеага ишонгим келмасди», — дейди Макклюр. Бўлиб ўтган воқеадан сўнг у дўсти билан бир неча марта Боббиттни йўқлаб, унга унча кўп бўлмаган пул ва зарур нарсаларни берган.

Жуфтлик бир йилдан бери кўчада яшаётган ва қизга ёрдам берган Боббитт ҳақида интернет орқали маълумот беришга қарор қилди ва хайрия учун пул йиғилаётганини эълон қилди.

Натижада америкаликлар Боббиттга ёрдам бериш учун ҳаммаси бўлиб 375 минг доллардан кўпроқ маблағ йўналтирди.

Журналистларнинг аниқлашича, Боббитт қачонлардир АҚШ денгиз пиёда қўшинларида хизмат қилган, тез ёрдам фельдшери факультетида таҳсил олган экан. Бироқ у кейинчалик наркотик моддалар қабул қила бошлаган.

Шимолий Каролинада яшаб келган Боббитт Филадельфияда ночорликда кун кечиришга мажбур бўлган.

«Мен ҳаётимни ўзгартиришни истайман. Кейинги тақдиримни қандай ҳал қилиш ҳақида ўйлаб олишим учун менга вақт керак», — дейди Боббитт журналистларга берган интервьюсида.

Шу билан бирга у йиғилган пулларнинг маълум қисмини кам таъминланганларга ёрдам берадиган биронта хайрия ташкилотига ўтказиб беришни режалаштираётганини маълум қилди.

Ўз навбатида Макклюр Боббиттга ҳуқуқий ва молиявий масалаларда консултация бериш учун мутахассислар билан келишиб олди.