Американинг Гавайи штатида совуқ уруш давридан буён биринчи маротаба ядровий ҳужумдан огоҳлантириш тизими синовдан ўтказилади. Бу ҳақда NBC’га таяниб, «Корреспондент.net» хабар берди.
Маҳаллий ҳукуматнинг бу каби қарорга келишига Вашингтон ва Пхеньян ўртасидаги вазият сабаб бўлди. Гавайи фавқулодда вазиятлар агентлиги раҳбари Верн Миягининг сўзларига кўра, КХДР томонидан ядровий зарба берилиш эҳтимоллиги кам, бироқ агарда вазият шунга етиб борса, орол «шимоллик»ларнинг биринчи нишонига айланади.
«Биз Шимолий Кореяга АҚШнинг бошқа ҳудудларига нисбатан яқинроқмиз. Хавфни сезмаслик қийин: биз учирилаётган ракеталар ва ядровий синовлар борасидаги янгиликларни кузатиб боряпмиз», — деди Мияги.
Огоҳлантириш тизими 1 декабрдан синовдан ўтказила бошланади. Сирена ҳар ойда янграши кутилмоқда. Шунингдек, сигналдан цунами ва тўфонлар яқинлашувида огоҳлантириш борасида ҳам фойдаланиш режалаштирилган.
Гавайи ҳукумати маҳаллий аҳолига ядровий ҳужум вақтида «иложи борича бетонли» бошпана топишни, у ерда камида 48 соатга етадиган ичимлик суви ва озиқ-овқат сақлашни тавсия этилмоқда.
Америкалик экспертларнинг таъкидлашича, КХДР ракеталари 20 дақиқада Гавайи оролларига қадар етиб кела олади. Ҳарбийларга ракеталар ҳаракатининг траекториясини аниқлаш учун беш дақиқа керак бўлади, шундан кейин аҳолини хавфдан огоҳлантиришга 15 дақиқа вақт қолади.
Изоҳ (0)