Россия таркибидаги Чувашистонда 24 ноябрь, жума куни юз берган йўл-транспорт ҳодисаси оқибатида беш киши ҳалок бўлди, икки ўзбекистонлик оғир тан жароҳати олди. Бу ҳақда «ТАСС» хабар бермоқда.
Хабар беришларича, саккиз йўловчига мўлжалланган микроавтобус трассада МАЗ юк машинаси билан тўқнашган. Тахминларга кўра, ЙТҲ микроавтобуснинг қарама-қарши қатнов қисмига чиқиб кетиши оқибатида юз берган. Авария бўлган вақтда кучли қор ёғаётган бўлган.
Ҳодиса оқибатида микроавтобуснинг 43 ёшли ҳайдовчиси, Қозон шаҳрида истиқомат қилувчи 37, 41 ва 65 ёшдаги уч эркак ва 28 ёшдаги бир аёл вафот этган. 1991 йилда туғилган икки нафар Ўзбекистон фуқароси эса оғир аҳволда Новочебоксарск шаҳар шифохонаси реанимация бўлимига ётқизилган.
Чувашистон Йўл ҳаракати хавфсизлиги давлат инспекцияси маълумотларига кўра, тўқнашув содир этган микроавтобус сўнгги бир ой ичида 18 марта чекланган тезлик тартибини бузган эди. Ҳодиса юзасидан жиноят иши қўзғатилгани айтилмоқда.
Изоҳ (0)