Ўзбекистонда нақд хорижий валютани қабул қилишнинг янгиланган тартиби белгиланди

Марказий банк, Молия вазирлиги ва Давлат солиқ қўмитаси қарори билан Ўзбекистон ҳудудида нақд хорижий валютани қабул қилиш тартиби тўғрисида низомга ўзгартиришлар киритилди. Бу ҳақда Norma хабар бермоқда.

Ҳужжат Ўзбекистон Президентининг «Валюта сиёсатини либераллаштириш бўйича биринчи навбатдаги чора-тадбирлар тўғрисида»ги фармони ижроси юзасидан қабул қилинди.

Низом билан Ўзбекистон ҳудудида хорижий валютада ҳисоб-китоблар ва тўловларни амалга ошириш пайтида нақд хорижий валютани қабул қилишнинг янгиланган тартиби белгиланди.

Эндиликда нақд хорижий валютани қуйидаги ҳолатларда:

- авиакомпаниялар ва уларнинг агентлари томонидан сотиладиган авиачипталар;

- божхона йиғимлари;

- хорижий ҳамкорларнинг Ўзбекистон фуқаролари томонидан маҳаллий туристик операторлар орқали кўрсатиладиган туристик хизматлар;

- кичик бизнес корхоналари томонидан ўзи ишлаб чиқарган экспорт қилинадиган товарлар (ишлар, хизматлар);

- экспедитор, ташувчи ва киракаш (фрахтчи) томонидан жисмоний шахсларга олиб чиқиладиган ёки олиб кириладиган юк транзити, ташилиши билан боғлиқ хизматлар кўрсатиш пайтида ташиш ва чартер (фрахт);

- хорижий валютадаги банк операциялари бўйича воситачилик ҳақини тўлаш;

- меҳмонхоналарда ва бошқа жойлаштириш жойларида хорижий фуқароларга ҳамда республикада доимий турар жойига эга бўлмаган, фуқаролиги бўлмаган шахсларга жойлаштириш бўйича кўрсатиладиган хизматлар учун тўловга қабул қилишга йўл қўйилмайди.

Қуйидаги операцияларни илгаригидек хорижий валютада амалга оширишга йўл қўйилади:

- кредитлар бўйича муддатли ва кечиктирилган қарзларни ҳамда улар бўйича хорижий валютадаги фоизларни сўндириш;

- юридик шахсларнинг устав фондига бадал тўлаш;

- банкларда омонатларга пул маблағларини киритиш;

- хайрия мақсадларида амалга ошириладиган пул маблағларини киритиш;

- суғурталаш ва қайта суғурталаш шартномалари бўйича қарзларни сўндириш;

- хорижий давлатлар дипломатик ваколатхоналарининг консуллик хизматлари учун;

- бож тўламасдан савдо қиладиган дўконлардаги ҳисоб-китоб операциялари;

- халқаро ташишлар пайтида транспорт воситаларининг бориш йўлида йўловчиларга товарлар ва хизматлар сотилганда.

Нақд хорижий валютани қабул қилиш (охирги иккита позициядан ташқари) тижорат банклари томонидан амалга оширилади.

Алоҳида қонун ҳужжатлари билан нақд хорижий валютани қабул қилишга рухсат бериладиган қўшимча ҳолатлар кўзда тутилиши мумкин.