Сентябрда Сирдарё вилояти Сайхунобод тумани ҳокими Носиржон Эгамбердиев тумандаги мактаб ўқитувчиларини ҳақорат қилиб, уларга қўл кўтараётгани акс этган видео пайдо бўлган эди. Куни кеча Андижон шаҳар ҳокими Дилмурод Раҳматуллаев коллеж директорларини ҳақорат қилаётгани ёзилган аудио эълон қилинди.
«Ватанинг мустақиллиги сенинг мустақиллигинг эмасми?»
12 сентябрь куни «Kun.uz» нашри Сирдарё вилояти Сайхунобод тумани ҳокими Носиржон Эгамбердиев тумандаги мактаб директорларини саф торттириб, уларни ҳақоратлар билан калтаклаётгани акс этган видеоёзувни эълон қилган эди.Ҳоким директорларни улар вилоятдаги Мустақиллик байрамига етарлича ўқитувчи олиб кела олмагани учун «жазолаган». Видеода Эгамбердиев ундан калтак еяётган шахслардан бирига қараб, жаҳл устида: «Ватанинг мустақиллиги сенинг мустақиллигинг эмасми?», — дея савол бераётганини кўриш мумкин.
«Kun.uz» маълумотига кўра, видео эълон қилинган куннинг ўзида Сирдарё вилояти ҳокими Ғофуржон Мирзаев Сайхунобод туманига келиб, йиғилиш ўтказган. Йиғилишда туман ҳокими ва мактаблар директорлари қатнашган, ҳоким Эгамбердиев қилган иши учун ўқитувчилардан узр сўраган.
Ўша йиғилишда вилоят ҳокими Ғофуржон Мирзаев туман ҳокими биргина узр сўраш билан қутула олмаслиги, унга тегишли чора кўрилишини таъкидлаган. «Эгамбердиевнинг иши пахта терим мавсумидан кейин кўриб чиқилади. Унинг ишда қолиш-қолмаслиги юқоридан келадиган кўрсатмага боғлиқ», — деган вилоят ҳокими.
13 сентябрь куни Ўзбекистон Бош прокуратураси мазкур воқеа юзасидан баёнот берди. «Газета.uz»нинг хабарига кўра, видеоёзувдаги ҳолатлар юзасидан Сирдарё вилоят прокуратураси текширув бошлаган, унинг бориши эса Бош прокуратура назоратига олинган эди.
Орадан икки ойдан кўпроқ вақт ўтди, терим мавсуми ҳам деярли якунига етиб қолди. Прокуратура текшируви қандай хулоса бергани, вилоят ҳокимлиги ва бошқа юқори мутасаддилар ушбу ҳолат юзасидан қандай фикрга келгани ҳақида ҳозирча бирор ахборот йўқ.
«Булар — Андижон шаҳрининг душмани!»
23 ноябрь куни «Kun.uz» нашри Андижон шаҳри ҳокими Дилмурод Раҳматуллаев ҳудуддаги коллежларнинг директорларини ҳақорат қилаётгани ёзилган аудиони эълон қилди. Хабар беришларича, бу аудиофайл шаҳардаги 50 мактаб, 12 коллеж ва лицей, 70 та боғча раҳбарлари қатнашган мажлисда ёзиб олинган.Audiода овози Андижон шаҳар ҳокиминики деб айтилаётган шахс пахта йиғим-теримига беш нафардан ҳашарчини етказиб бера олмаган коллежларнинг вакилларини бирма-бир ҳақорат қилаётганини эшитиш мумкин. «Шакал», «ифлос» — ҳоким тилидан жаранглаган «энг оғриқсиз» сўзлар.
Шаҳар ҳокими беш кишидан иборат терим гуруҳларини тайёрлаб бера олмаган коллежлар вакилларини «гадойлар» деб атаб, уларни: «Андижон шаҳрининг душманлари!», деб атаган, шаҳар ҳокимлигининг шундай талабини бажарган имом-хатибларни таълим муассасалари раҳбарларига намуна қилиб кўрсатган.
Ҳоким Дилмурод Раҳматуллаев коллежлар вакилларини ҳақорат қиларкан, уларнинг аёл ё эркаклигига қараб ўтирмаган, «Ҳаммангга тупурганман», дея бир неча бор таъкидлаган. «Шаҳарда яшайсанми? Шаҳарга ҳиссангни қўшмайдиган бўлсанг, шаҳар электридан фойдаланишга, шаҳарда яшашга нима ҳақинг бор?», — дея, ҳоким «айбдор»лардан бирига савол берган.
Коллежлар директорлари шаҳар ҳокими томонидан ҳақорат қилиб, камситилган бу тадбир 16 октябрь куни бўлиб ўтган. Қайд этиш жоиз, бунгача — 8 август куни Вазирлар Маҳкамаси пахта йиғим-теримига, хусусан, таълим муассасалари ходимларини жалб этишни қатъий тақиқловчи баённома қарорини чиқарган, 21 сентябрь куни эса бош вазир Абдулла Арипов 8 августдаги баённома қарори ижроси таъминлашни талаб қилганидан сўнг, талабалар, тиббиёт ва таълим соҳаси вакиллари мамлакат пахта далаларидан олиб чиқилган эди.
«Kun.uz» маълумотига кўра, Дилмурод Раҳматуллаев 2015 йилгача (11 йил давомида) Андижон вилоят Халқ таълими бошқармасига раҳбарлик қилган. Сўнг унга қарши иш очилган, шу боис бошқарма раҳбарлигидан олинган. 2016 йилда эса Андижон шаҳар ҳокими этиб тайинланган.
«Бундай ҳаракатлар Президент сиёсатига қарши чиқиш деб баҳоланади»
15 ноябрь куни бўлиб ўтган видеоселектор йиғилишида Ўзбекистон Президенти Шавкат Мирзиёев қўл остидаги ходимларни беҳурмат этиб, ҳақорат қилаётган, ҳатто уларга қўл кўтараётган раҳбар ходимлар ҳақида маълумотлар кўплаб тушаётганини таъкидлаган эди.Агар кимдир бундай шармандали ҳолатларни берилган топшириқлар ёки белгиланган режани бажариш билан боғлаб ўзини оқламоқчи бўлса, шуни қулоғига яхшилаб қуйиб олсин: иш юзасидан талабчанлик қилиш бошқа, одамларнинг шахсига тегиш — бутунлай бошқача нарса. Қўл остидаги ходимлар сизга фақат иш юзасидан бўйсуниши, қолган масалаларда сиз билан теппа-тенг ҳуқуқ эгаси эканини асло эсингиздан чиқарманг!..Барча бўғинлардаги раҳбарлар — у вазир ёки ҳоким бўладими, идора ёки ташкилот бошлиғи бўладими — бир ҳақиқатни жуда чуқур тушуниб олишингиз шарт: бундай ҳаракатлар давлат сиёсатига, Президент сиёсатига қарши чиқиш деб баҳоланади ва айбдорларга, албатта, тегишли жазолар қилинади.
Шавкат Мирзиёев, Ўзбекистон Президенти
Муштумзўр ва қўпол ҳокимлар — камёб ҳодиса эмас
Ҳоким Эгамбердиев ва ҳоким Раҳматуллаев билан боғлиқ ҳодисалар — ягона эмас, афсуски. «Бу республикадаги кўплаб муштумзўр ҳокимлардан бирининг фош бўлиб қолган қилмиши, — деб ёзади «Kun.uz» журналисти Азиз Қаршиев. — Бу ҳолатда фақат бир кишининг жасорат билан зўравон ҳокимнинг ‘ихтиёрига қарши бориши’ орқали унинг кирдикорларидан барча огоҳ бўлмоқда. Лекин республикада бундай ҳолатлар озми? Барча ҳам зўравонликка қарши чиқиб, ўз ҳуқуқларини талаб қила оладими?».Ҳокимлар, раҳбарларнинг бундай муштумзўрлиги, зўравонлиги сабаблари ҳақида ҳам жамоатчилик вакилларининг фикрлари ўхшаш. «Дарё» колумнисти Азизбек Абдувалиевнинг фикрича, ҳокимларга ўта катта ваколатлар берилгани, уларнинг ўта катта босим остида ишлаётгани ва бунинг оқибатида кучли зўриқиши натижасида улар мана шундай зўравон бўлиб қоляпти. «Балки ҳокимларга ҳаддан ташқари кўп ваколатлар тақдим этилгани, ўз тасарруфида бўлмаган соҳаларга ҳам хўжайинлик қилиши шундай аянчли оқибатни юзага келтиргандир?», — деб савол қўяди «Kun.uz» журналисти Азиз Қаршиев.
Ҳар нима бўлганда ҳам, Президент Шавкат Мирзиёев таъкидлаганидек, «бу бизга умуман номаъқул нарса. Бу иллатни йўқ қилиш керак».
Изоҳ (0)