Қозоғистон ва Ўзбекистон мамлакатлар ўртасидаги авиарейслар сонини кўпайтиради, дея хабар бермоқда «Казинформ» Қозоғистон инвестиция ва тараққиёт вазирлигига таяниб.
«Эйр Астана» 2017 йил декабридан Ўзбекистонга рейслар сонини кўпайтирмоқчи: 2 декабрдан Олмаота—Тошкент йўналишидаги рейслар ҳар куни (ҳафтасига 7 марта) амалга оширилади; 3 декабрдан Остона—Тошкент йўналишидаги рейслар эса 4 тага етказилади ва шанба кунлари ҳам амалга ошириладиган бўлади.
Ўз навбатида, «Ўзбекистон ҳаво йўллари» 4 декабрдан Тошкент—Олмаота йўналишидаги рейсларни 7 тага етказади, 2018 йилнинг 4 мартидан бошлаб эса Тошкент—Остона йўналиши бўйича рейслар ҳафтасига 4 тага етказилади.
Натижада мамлакатлар ўртасидаги рейсларнинг умумий сони ҳафтасига 22 тани ташкил қилади. Шу тариқа, йўловчилар Олмаотадан Тошкентга кунига икки марта, Остонадан эса бир марта учиб кетиши мумкин бўлади.