Хитой ҳукумати Сомалининг марказий ва жанубий туманларида очлик ҳамда турли касалликлардан азият чекаётган болаларга ёрдам кўрсатиш учун БМТ болалар жамғармаси (ЮНИСЕФ)га икки миллион доллар маблағ ажратди, деб хабар беради «ТАСС».
«Мазкур қарор Пекиннинг халқаро инсонпарварлик фаолияти доирасидаги Сомалидаги ижтимоий ҳимояга муҳтож гуруҳлар, биринчи навбатда аёллар ва болаларни ҳимоя қилишга қаратилган мажбуриятлари юзасидан қабул қилинди», — дейди Хитойнинг Могадишодаги элчиси Цинь Цзянь.
Унинг сўзларига кўра, мазкур моддий кўмак орқали 15 минг нафар боланинг сифатли овқатланиши ва тиббий хизматдан фойдаланишини таъминлашга эришилади.
«ЮНИСЕФ орқали биз узоқ ҳудудларда яшайдиган аҳолининг ночор қатлами вакилларини қўллаб-қувватлашни режалаштирмоқдамиз. Ҳамкорликдаги ҳаракатлар орқали сомалиликларга қийинчиликларни бартараф этишга кўмаклашамиз», — дейди элчи.
Сомалида 2018 йилда БМТ халқаро ҳамжамиятига аъзо давлатлар ва Хитойнинг ёрдами билан муттасил очликдан азият чекаётган 230 мингдан ортиқ болага ёрдам кўрсатилиши режалаштирилмоқда.
Сўнгги пайтларда Сомалида кузатилаётган қурғоқчилик туфайли очарчилик кучайди.
Изоҳ (0)