Чеченистон раҳбари Рамзан Қодиров Россия президенти лавозимида Владимир Путиннинг ўрнини боса оладиган одамни кўрмаётганлигини айтди, деб ёзади «Ведомости».
Қодировнинг фикрича, бошқа вариант давлат ва миллат ҳалокатига олиб келган бўларди. «Агар мен АҚШ ва Ғарбни Россия душманлари деб атасам, ғала-ғовур кўтарилади», — деди Қодиров. Аммо унинг фикрига кўра, уларнинг ўзи Россияни ҳарбий базалар билан қуршаб олиб, ракетага қарши мудофаа тизимларини яратиб ва «замонавий тарихда кўз кўриб, қулоқ эшитмаган санкция сиёсатини олиб бориб», буни намоён этмоқда.
«АҚШ Россияга қарши жаҳон коалициясини тузишга уриняпти, аммо бу режалар оқсаяпти, чунки Путин АҚШ ва Ғарбнинг Россияга қарши санкцияларининг эҳтимолий оқибатларини зарарсизлантирди ҳамда иқтисодиёт, қишлоқ хўжалик саноати ўсиши, жамоатчиликда барқарорлик юзага келиши, Сурия муаммоасини ечиш учун шароитлар ярата олди», — деди Қодиров.
Унинг ишонч билдиришича, Путин сайловга ўз номзодини қўйса, у Россия президентлигига сайланади. «У эса ҳақиқий ватанпарвар сифатида бошқача йўл тутишга ҳақи йўқ. Шахсан мен Путиннинг ўрнини боса оладиган одамни кўрмаяпман», — деди Қодиров.
Изоҳ (0)