Ўзбекистон қонунчилигида дарахт ва буталарни кесишга бир нечта ҳолатлардагина рухсат берилган. Агар дарахтлар қуриган ва чириган деб топилса, рухсатномада дарахт кесилганлиги учун табиатни муҳофаза қилиш жамғармасига пул тўланмайди деб ёзилади. Агар дарахтни кесиш қурилиш сабабли бўлса, тўлов кўзда тутилган, деб ёзади «Nuz.uz».
Тошкентдаги Анҳор бўйида ноябрда бошланган дарахт кесиш ишлари тўлов олинадиган ҳолатдир. Бу ерда, «Ўзбекистон темир йўллари» компанияси вакили сўзларига кўра, «Анҳор-Локомотив» боғига олиб борадиган осма кўприк қурилади. Унинг айтишича, компания жамғармага Анҳорнинг бир қирғоғидаги дарахтлар кесилгани учун 22 миллион, иккинчи қирғоғидагилар учун 27 миллион сўм тўлайди.
«Парадокс, аммо Ўзбекистоннинг табиат муҳофазаси бўйича бош муассасаси дарахтлар кесилишидан манфаатдор. У дарахтларни экмаган ва ўстирмаган. Истироҳат боғига кўприк қурилишидан у 50 миллион сўм пулни ҳадя сифатида олди», — дейилади хабарда.
Мақолада таъкидланишича, айнан маҳаллий ҳукумат кўплаб дарахтлар кесиб ташланадиган, йўл ва бошқа объектлар қурилиши чоғида буюртмачи ҳисобланади. Вазирлар Маҳкамаси қарорига мувофиқ, айнан ҳокимлик дарахт кесиш учун рухсатнома беради.
Ноябрда, шунингдек, Чилонзорнинг 11-даҳасида ҳам дарахтлар бирин-кетин кесила бошлаган. Мақола муаллифи дарахт кесувчилар орқали бу «микроҳокимнинг буйруғи билан» амалга оширилаётганидан хабар топган. У Тошкент ва Сирдарё вилоятлари бўйича табиий ҳудудларни қўриқлаш ва биохилма-хилликдан фойдаланиш устидан назорат инспекциясига мурожаат қилганида «микроҳоким» рухсатнома учун мурожаат қилмаганлиги маълум бўлди. Инспекция чора кўришга ваъда берди.
Изоҳ (0)