АҚШ давлат котиби Рекс Тиллерсон халқаро ҳамжамият ва АҚШ томонидан КХДРга бўлаётган босим иш бераётганини маълум қилди, деб ёзади «Газета.ru».
Тиллерсон яқинда президент Дональд Трамп томонидан КХДР терроризм ҳомийлари бўлган давлатлар рўйхатига киритилганини ҳам эслатиб ўтди.
Шунингдек, Трамп Шимолий Кореяга қарши янги санкциялар жорий этилгани ва улар ҳақида 21 ноябрда маълум қилинишини эълон қилди.
«Мен бу ҳолат Шимолий Кореяга етарлича таъсир кўрсатади, деб ҳисоблайман. Биламизки, Шимолий Кореяда ёқилғи тақчиллиги мавжуд, биламизки, даромадлар кўрсаткичи паст. Шунинг учун бу босимлар иш беряпти. КХДР 60 кундан бери провокацион ҳаракатлар қилмаётгани мазкур ҳолатга боғлиқми? Тахмин қилишни истамайман, лекин бу муддат давом этишига умид қиламиз», — дейди Тиллерсон.
У шунингдек, АҚШ Хитойнинг Пхеньянга нисбатан БМТ хавфсизлик кенгаши санкцияларини амалга ошириш тарафдори эканлигига амин бўлиш учун ушбу мамлакат билан музокаралар олиб бораётганини ҳам қўшимча қилди.
Изоҳ (0)