Россиянинг «Транснефть» компанияси Қозоғистон орқали транзит билан Ўзбекистонга синов тариқасида нефть етказиб беришни бошлади. Хом ашё Омск—Павлодар—Чимкент нефть қувури орқали етказилмоқда, у ёғига темир йўл орқали ташилади, дея хабар беради «Kommersant.uz».
Етказиб бериладиган хом ашё ҳажми ойига 30 минг тоннадан иборат, бироқ талабга биноан суткасига 2 минг тоннагача кўпайтирилиши мумкин. 2018 йилда «Ўзбекнефтегаз» мазкур ҳажм 1 миллион тоннага етишига умид қилмоқда.
«Коммерсантъ» нашрига кўра, умумий қуввати 11 миллион тонна бўлган нефтни қайта ишлаш заводларини хом ашё билан таъминлаш учун Ўзбекистон қўшимча нефть сотиб олишга мажбур, чунки ўзи ишлаб чиқарган хом ашё бунинг учун етарли эмас. Импорт нефть асосан темир йўл орқали келтирилади, қувур орқали етказиладиган Россия нефти эса арзон тушади. Шу сабабли Ўзбекистон уларнинг ҳажмини кўпайтиришдан манфаатдор.
Шунингдек, 2022 йилда Ўзбекистонга қуввати йилига 5 миллион тонна бўлган Жиззах вилоятидаги янги нефтни қайта ишлаш заводи учун нефтнинг қўшимча ҳажмлари керак бўлади. Тошкент ва Остона 2021 йилда айнан шу қувватга мўлжалланган Чимкент — Жиззах магистрал нефть қувурини битказишни режалаштирган. Қозоғистон мазкур қувур орқали йилига 2 миллион тонна ўз нефтини етказиб беришни кўзламоқда.
Изоҳ (0)