15 ноябрь куни Ўзбекистон мусулмонлари идорасининг Андижон вилоят вакиллиги мажлислар залида «Ислом – тинчлик ва эзгулик дини» мавзусида диний соҳа ходимларининг Республика анжумани бўлиб ўтди, деб хабар беради Фарғона вилояти вакиллиги сайти.
Анжуманда Ўзбекистон мусулмонлари идораси раиси, муфтий Усмонхон Алимов сўзга чиқиб, сўнгги вақтларда Ўзбекистонда барча соҳада олиб борилаётган ислоҳотлар ҳамда бугуннинг долзарб масалалари ҳақида гапириб, имом-хатибларнинг вазифа ва масъулиятлари борасида ҳам тўхталиб ўтди.
«Бугун глобал ахборот маконида ҳамма кучлар ўз манфаатлари учун кураш олиб бормоқда. Интернет имкониятларидан кенг фойдаланишни тарғиб қилар эканмиз, унинг фойдали жиҳатларига эътибор қаратиб, зарарли томонларидан огоҳликка чақиришимиз зарур. Турли манбаси номаълум сайтларда одам ақлини чалғитувчи, айниқса ёшларимизни тўғри йўлдан оздирувчи, яширин ғоялар мавжудлигини уларга тушунтириб боришлари даркор. Бундай сайтларнинг бош ғояси соф ислом таълимотини бузиб талқин этиш, шу орқали қалби нафис ёшларнинг фикрини заҳарлаш орқали тинч-тотув ҳаётларини издан чиқариш, алал-оқибат юрт тинчлигига рахна солишдан иборатдир. Бу масалаларни тушунтиришда ислом дини бу маърифат, илму ирфон, эзгулик, жамият тараққиётига хизмат қилувчи дин эканига алоҳида эътибор беришлари керак», — дейди Усмонхон Алимов.
Шунингдек, Ўзбекистон мусулмонлари идораси раиси ҳар бир имом-хатиб иш жараёнини замонавий техника воситалари ёрдамида амалга ошириши кераклигини таъкидлади.
«Замон технологияларига бегона кўз билан қараш биз диний соҳа вакилларининг айримларига одат бўлиб қолган. Ваҳоланки бундай технологиялар нафақат иш юритишни енгиллатади, балки унинг таркибий қисми бўлган ижтимоий тармоқлар ёшларнинг дин ўрганишдаги асосий манбаларига айланиб улгурди. Шунинг учун сиз имом-хатибларнинг олдингиздаги бирламчи вазифа ана шу минбарларни ғаразгўйлардан тортиб олиб, халқимизга ислом маърифатини ёйишнинг яна бир воситаси сифатида улардан унумли фойдаланишингиз даркор», — дейди Усмонхон Алимов.
Изоҳ (0)