Британиядаги ҳар бир оила мамлакатнинг Европа Иттифоқидан (Brexit) чиқиши учун ўтказилган референдумдан сўнг, йилига 404 фунт стерлинг (534 доллар) йўқотмоқда. Бу ҳақда Лондон иқтисодиёт мактабининг иқтисодий кўрсаткичлар Маркази томонидан эълон қилинган тадқиқот натижаларига таяниб «ТАСС» хабар берди.
«Референдум натижалари асосида ўтказилган бу турдаги биринчи статистик таҳлилга кўра, референдум инфляцияга, реал иш ҳақига ва Буюк Британия аҳолисининг ҳаёт даражасига салбий таъсир кўрсатган. Нархлар ошганлиги сабаб Brexit мамлакатдаги уй хўжаликларига ҳафтасига ўртача 7,74 фунт стерлингга (10,23 доллар), йилига эса 404 фунт стерлингга (534 доллар) тушмоқда», — дейилади ҳисоботда.
Марказ мутахассисларининг ҳисоб-китобларида келтирилишича, нархлар ошганлиги сабаб ҳар бир ишчи бир йилда ичида бир ҳафта давомида ишлаб топган маошини йўқотмоқда. Шу билан бирга, нархларнинг ўсиши импортнинг улуши юқори бўлган товарлар гуруҳлари бўйича кузатилмоқда: нон ва ун, сут маҳсулотлари, қаҳва, чой, какао, вино, пиво, мебель, заргарлик буюмлари ва соатлар.
Инфляция даражасининг ошишидан кўпроқ Шотландия, Уэльс ва Шимолий Ирландия зарар кўрди, нархлар кўтарилишининг энг паст кўрсаткичи Лондонда кузатилган.
Изоҳ (0)