АҚШдаги турмалардан бирида умрбод қамоқ жазосини ўтаётган америкалик серияли қотил Чарльз Мэнсон 83 ёшида вафот этди. Бу ҳақда TMZ портали Мэнсоннинг қурбонларидан бирининг опасига таяниб хабар берди, деб ёзади «Газета.ru».
Қизнинг айтишича, қотил жазони ўтаётган қамоқхона унинг қурбонлари қариндошлари билан алоқа сақлаб туради. Тошкент вақти билан 20 ноябрь куни 9:13 да унга қўнғироқ қилиб, Мэнсоннинг ўлими ҳақида хабар беришган.
ABC News телеканали қамоқхона вакилига таяниб, Мэнсоннинг вафотини тасдиқлади. Аввалроқ қотил қамоқхонадан касалхонага етказилгани маълум қилинган эди.
Мэнсон 1969 йилда ўзининг «Оила» деб номланган жиноий гуруҳи билан бирга режиссёр Роман Поланскининг рафиқаси Шэрон Тейт ва унинг тўрт нафар дўстини ўлдирган. Бундан ташқари, Мэнсон яна иккита қотилликда айбдор деб топилган.
Айрим маълумотларга кўра, у содир этган қотилликларнинг сони бундан ҳам кўпроқ.
Мэнсон ва унинг уч шеригига ўлим жазоси берилган, бироқ 1972 йилда Калифорнияда ўлим жазоси бекор қилингани учун улар умрбод озодликдан маҳрум этилган.
Изоҳ (0)