«Дарё» мухбирининг маълум қилишича, соат 19:00 атрофида «Эшонгузар» ва «Эркин» постларида шаҳардан чиқиш йўналишида катта тирбандликлар юзага келган. «‘Эркин’ постидаги тирбандлик ‘Оқ тулпор’ тўйхонасига қадар чўзилган», — дейди мухбир.
Facebook ва Telegram’даги «Водители Ташкента» гуруҳ ва каналларида 20 ноябрь куни тушдан бошлаб шаҳар постларида тирбандликлар кузатилаётгани ҳақида хабарлар қолдирилган.
Ижтимоий тармоқ фойдаланувчиларидан бири томонидан соат 13:10 да қолдирилган хабарга кўра, «постларда жуда қаттиқ текширув бўляпти, кимнидир қидиришяпти; тирбандлик 1 километрга чўзилган».
Бошқа фойдаланувчилар «Келес», «Барданкўл» постларидаги катта тирбандликлар ҳақида ёзган. «‘Барданкўл’да маршрутка ва автобуслар тўлиқ текширилмоқда», — дейди фойдаланувчилардан бири.
Қайд этиш жоиз, 20 ноябрь куни Олмазор туманидаги руҳий касалликлар шифохонасидан муқаддам судланган уч бемор қочиб кетгани ҳақида хабар берилган эди. Кейинроқ уларнинг икки нафари қўлга олингани маълум бўлди.
Тошкент шаҳар ИИББ матбуот хизмати ахборотига кўра, айни вақтда учинчи қочоқ бемор — Шерқул Омоновни қўлга олиш бўйича тезкор-қидирув тадбирлари олиб борилмоқда. Тирбандликлар айнан шу қидирув билан боғлиқми ёки йўқ — ҳозирча номаълум.
Изоҳ (0)