Ҳиндистон фуқароси Суяш Диксит 7 ноябрь куни Миср ва Судан ўртасидаги Бир-Тавиль ўлкаси қироли деб эълон қилди, бу ерга даъвогарликдан иккала мамлакат ҳам воз кечган. Ҳудуд майдони 2060 квадрат километрни ташкил қилади. Бу ҳақда TJournal хабар бермоқда.
Диксит Миср ҳарбийлари томонидан қўриқланадиган йўналиш бўйича юрганини айтди. Ҳудудда террорчилар кўп бўлгани сабабли, ҳарбийларга огоҳлантиришсиз отиш буйруғи берилган. Миср чегарасини кесиб ўтиш учун у ҳарбийлардан рухсат сўраган. Уни ҳарбий объектлар фонида сурат олмаслик ҳамда ўша куниёқ қайтиб келиш ва қимматли буюмларини ташлаб кетиш шарти билан қўйиб юборишган.
Диксит ўз қариндошини бош вазир ва ҳарбий вазирлик раҳбари деб эълон қилди, ўз отасини эса президент этиб тайинлади. Янги қирол «хорижий инвестициялар ва фуқароликка кириш аризалари» учун сайтни ишга туширди. У шунингдек, БМТга мурожаат қилмоқчи.
Ҳиндистонлик у Бир-Тавилга келган биринчи одам эмаслигини таъкидлади. «5—10 киши мендан олдин ҳам келганини биламан, аммо энди бу менинг ерим. Агар улар ўлкани қайтариб олмоқчи бўлса, у ҳолда биз уруш қиламиз (Starbucks’да бир финжон қаҳва устида)», — деб ёзди у.
Изоҳ (0)