2017 йил 16 ноябрда Ўзбекистон Республикаси адлия вазири Русланбек Давлетов Исроилнинг Ўзбекистондаги элчиси Эдуард Шапира билан учрашди, деб хабар берди вазирлик матбуот хизмати.
Адлия вазири Эдуард Шапирани элчи лавозимига тайинлангани билан қутлаб, Ўзбекистон Исроил билан ҳар томонлама ва узоқ муддатли ҳамкорлик алоқаларини кенгайтиришга алоҳида эътибор қаратилаётганлигини таъкидлади.
Ўзбекистон томони қайд этганидек, Адлия вазирлиги Исроил билан туризмни ривожлантириш, унинг ҳудудида Ўзбекистон туристик маҳсулотини илгари суриш, Исроилдан сайёҳлар оқимини жалб қилиш масалаларида ўзаро ҳамкорликни фаоллаштиришни таъминлаш борасида масъул ҳисобланади.
Шу боис, Русланбек Давлетов меҳмонга Ўзбекистоннинг туризм соҳасини ривожлантириш, мамлакат обрў-эътиборини халқаро майдонда мустаҳкамлаш борасидаги сиёсати, ўзбек халқининг маънавий-маданий мероси ва туристик-рекреацион салоҳияти ҳақида қисқача маълумот берди.
Ўз навбатида, элчи Эдуард Шапира Русланбек Давлетовга ушбу учрашувни ташкил этгани учун миннатдорчилик изҳор этди ва Ўзбекистон — Исроил ўртасида икки томонлама муносабатлар янада ривожланишига умид билдирди.
Вазир таъкидлаганидек, Ўзбекистон томони идора ваколатига кирувчи барча соҳаларда мулоқот ва ҳамкорлик учун очиқдир.
Учрашув якунида томонлар мулоқот ишчанлик ва самимий руҳда ўтганлигини қайд этди.
Изоҳ (0)