Валюта бозорининг либераллаштирилиши ва алмашув курсини шакллантиришда бозор механизмларининг жорий этилиши миллий экспортчи корхоналар хўжалик фаолиятига ижобий таъсир кўрсатиб, маҳаллий маҳсулот ва хизматлар нарх рақобатбардошлиги даражасини яхшилади. Бу ҳақда Ўзбекистон Марказий банки томонидан 5 сентябрдан 14 ноябргача бўлган давр мобайнидаги ички валюта бозори таҳлилида сўз боради, деб хабар берди «Газета.uz». Таъкидлаш жоизки, бундай таҳлил биринчи маротаба чоп этилмоқда.
Иқтисодиётда кузатилаётган ўзгаришлар манзарасида 2017 йилнинг дастлабки 10 ойи давомида экспортдан валюта тушумлари ҳажми ўтган йилнинг шу даврига нисбатан 20 фоиздан зиёдроққа ўсди. Ўзбекистоннинг олтин-валюта захиралари ҳажми сентябрь—октябрь ойларида 754 миллион долларга ошиб, 1 ноябрь ҳолати бўйича 26 миллиард доллардан зиёдроқни ташкил этди.
Марказий банк юридик ва жисмоний шахсларнинг валюта операцияларини амалга оширишда норасмий сектордан банк секторига жадал равишда ўтаётганини қайд этди.
Юридик шахсларга 1,767 миллиард доллар сотилиб, улардан 1,442 миллиард доллар харид қилинди. Марказий банк талабга бўлган таклифнинг ортиши натижасида алмашув курси ўртасидаги фарқнинг кескин ортиб кетишига йўл қўймаслик мақсадида 325 миллион доллар ҳажмидаги валютани сотиб олди. Таққослаш учун — биринчи ярим йилликда МБ ҳар ойда ўртача 290 миллион долларни валюта захиралари ҳисобидан сотган.
Хорижий валюта таклифлари тузилмаси экспортчиларнинг 915 миллион доллари (52 фоиз) ҳамда тижорий банкларнинг 852 миллион доллар, шу жумладан, аҳолидан айирбошлаш шохобчалари орқали сотиб олинган валютани сотиб олиш ҳисобидан шакллантирилди.
Хорижий валюта сотиб олишга талаблар тузилмаси ишлаб чиқаришга йўналтирилган импорт учун 1,212 миллиард доллар, чет эл кредитларини қоплаш учун 91 миллион доллари, халқ истеъмоли маҳсулотлари ва дори воситалари импорти учун 79 миллиард доллар ва чет эллик инвесторлар даромадларини репатриация қилиш учун 55 миллион доллар миқдоридаги маблағлар харид қилиш ҳисобидан шакллантирилди.
Умуман олганда, валюта бозори либераллаштирилганидан сўнг, ички валюта бозоридаги операцияларнинг ўртача ойлик ҳажми сезиларли даражада ўсди. Хўжалик субъектлари томонидан сотиб олинган ойлик ўртача хорижий валюталар миқдори 25 фоизга (116 миллион доллар) ўсиб, биринчи ярим йилликдаги 461 миллион доллардан сентябрь—ноябрь ойларида 577 миллион долларни ташкил этди.
Хорижий валютани сотиш бўйича ойлик ўртача кўрсаткич 4 баробардан зиёдроққа ошиб, биринчи ярим йилликдаги 172 миллион доллардан 707 миллион долларга етди.
Икки ярим ой мобайнида тижорий банклар томонидан жисмоний шахслардан 644 миллион доллар миқдорида нақд пул кўринишидаги хорижий валюта сотиб олинди. Конверсион операциялар (жисмоний шахсларга хорижий валюа сотиш) ҳажми 23 миллион долларни ташкил этди. Бунда айниқса импорт билан шуғулланувчи якка тартибдаги тадбиркорлар билан конверсион операциялар ҳажми ҳар ойда ўсиб бормоқда.
Сентябрь бошидан буён айирбошлаш курсида кескин ўзгариш кузатилмади, айирбошлаш курси 1 доллар учун 8049—8110 сўм (1 фоиздан камроқ) атрофида тебраниб турди.
Октябрда банк кассалари орқали нақд пул айланмаси ҳажми биринчи ярим йилликнинг ўртача ойлик кўрсаткичларига нисбатан 2,3 баробардан ортиқроққа ўсиб, нақд пул тушими ва харажатлари ўртасидаги мувозанат меъёрини таъминлади. Бунда банк кассаларига тушумлар ҳажми 2,8 баробарга ўсди (биринчи ярим йилликда ўртача ойлик ҳажм 2 триллион сўм бўлган ҳолатда октябрда 5,7 триллион сўмни ташкил этди).
Изоҳ (0)