14 ноябрь куни Ўзбекистон Ёшлар иттифоқи ва мамлакат Мудофаа вазирлиги ўртасида ҳамкорлик меморандуми имзоланди, дея хабар бермоқда «Газета.uz».
Меморандум ҳарбий қисм ва муассасаларда Иттифоқнинг бошланғич тузилмаларини тузиш, ҳарбийларни ҳар томонлама қўллаб-қувватлаш, ёш ҳарбий хизматчиларнинг, жумладан, чақирувга қадар ёшларнинг турли мафкуравий таҳдидларга қарши мустаҳкам иммунитетини шакллантириш каби мақсадларга хизмат қилади.
Ҳамкорлик доирасида, ҳудудларда «Жасорат» клублари фаолиятини йўлга қўйиш, «Ёшлар поезди» акциясида ҳарбийлар иштирокини таъминлаш, хизматни ўтаган ёшлар билан узлуксиз алоқани йўлга қўйиш, хизматдан қайтган йигитларнинг бандлигини таъминлаш каби тадбирлар амалга оширилади.
«Меморандумнинг имзоланишидан кўзланган мақсад — ёшларимизда мамлакатга нисбатан ватанпарварлик ҳиссини шакллантиришдир. Биз ёшларга яқинроқ бўлиш ва улар билан бирга иш олиб бориш мақсадида бу битимни имзоладик», — деди Ўзбекистон мудофаа вазири Абдусалом Азизов.
«Биз Ўзбекистонни асраб-авайлашимиз керак, чунки жаҳондаги вазият мураккаб, қўшни Афғонистонда халқаро террорчилик гуруҳлари ҳаракат қилмоқда. Ёшлар иттифоқи билан ҳамкорлик қиларканмиз, Ўзбекистоннинг мустақиллигини биргаликда ҳимоя қила оламиз — бизда давлатни муҳофаза қилишдан бошқа вазифа йўқ», — дея қўшимча қилди вазир.
Изоҳ (0)