Фарғона водийсида 18 та ер ости сув конлари мавжуд бўлиб, улардан 6 таси Фарғона вилояти ҳудудида жойлашган. Бу ҳақда Фарғона гидрогеология экспедицияси давлат корхонаси директори Р.Бегматов маълум қилди, дея хабар беради ЎзА.
Улар бўйича баҳоланган ер ости сувларининг минтақавий захиралари бир кеча-кундузда 9,447 миллион куб метрни ташкил этади. 2 мингдан ортиқ қудуқ табиий фаввора асосида фаолият кўрсатиб, улардан ер ости сувлари олинмоқда.
«Афсуски, тик қудуқларнинг 40-50 фоизи бошқарув жўмракларига эга эмас, маълум миқдордаги ер ости чучук суви самарасиз оқиб ётибди», — дейилади ЎзА ахборотида.
Вилоятда аҳолининг ичимлик суви таъминоти ҳолати ва бунда сув таъминоти, айниқса, ер ости чучук сув манбаларидан оқилона ва самарали фойдаланиш масалаларига алоҳида эътибор қаратилди.
Вазирлар Маҳкамасининг «2017—2022 йилларда ер ости чучук сувларини ишлатишни кенгайтириш ҳисобига Фарғона водийси аҳолисини тоза ичимлик суви билан таъминлаш тизимини такомиллаштиришнинг қўшимча чора-тадбирлари тўғрисида»ги қарори асосида иш бошлаб юборилди.
Мазкур қарор ижроси доирасида вилоятда бир кеча-кундузда 147,3 минг куб метр ер ости чучук сув захираларининг кўпайиши ва фойдаланишга топширилиши, 950 минг куб метр миқдоридаги ер ости чучук сув захираларининг қайта баҳоланиши ва фойдаланиш муддатининг узайиши, Фарғона, Қўқон шаҳарлари, Бешариқ, Қува туманлари мелиоратив ҳолатини яхшилаш бўйича асосли таклиф ва чора-тадбирлар ишлаб чиқилишига эришилади.
Изоҳ (0)