Farg‘ona vodiysida 18 ta yer osti suv konlari mavjud bo‘lib, ulardan 6 tasi Farg‘ona viloyati hududida joylashgan. Bu haqda Farg‘ona gidrogeologiya ekspeditsiyasi davlat korxonasi direktori R.Begmatov ma’lum qildi, deya xabar beradi O‘zA.
Ular bo‘yicha baholangan yer osti suvlarining mintaqaviy zaxiralari bir kecha-kunduzda 9,447 million kub metrni tashkil etadi. 2 mingdan ortiq quduq tabiiy favvora asosida faoliyat ko‘rsatib, ulardan yer osti suvlari olinmoqda.
“Afsuski, tik quduqlarning 40-50 foizi boshqaruv jo‘mraklariga ega emas, ma’lum miqdordagi yer osti chuchuk suvi samarasiz oqib yotibdi”, — deyiladi O‘zA axborotida.
Viloyatda aholining ichimlik suvi ta’minoti holati va bunda suv ta’minoti, ayniqsa, yer osti chuchuk suv manbalaridan oqilona va samarali foydalanish masalalariga alohida e’tibor qaratildi.
Vazirlar Mahkamasining “2017—2022-yillarda yer osti chuchuk suvlarini ishlatishni kengaytirish hisobiga Farg‘ona vodiysi aholisini toza ichimlik suvi bilan ta’minlash tizimini takomillashtirishning qo‘shimcha chora-tadbirlari to‘g‘risida”gi qarori asosida ish boshlab yuborildi.
Mazkur qaror ijrosi doirasida viloyatda bir kecha-kunduzda 147,3 ming kub metr yer osti chuchuk suv zaxiralarining ko‘payishi va foydalanishga topshirilishi, 950 ming kub metr miqdoridagi yer osti chuchuk suv zaxiralarining qayta baholanishi va foydalanish muddatining uzayishi, Farg‘ona, Qo‘qon shaharlari, Beshariq, Quva tumanlari meliorativ holatini yaxshilash bo‘yicha asosli taklif va chora-tadbirlar ishlab chiqilishiga erishiladi.
Izoh (0)