Россия меҳнат ва ижтимоий ҳимоя вазири Максим Топилин бошчилигидаги делегация Тошкент шаҳридаги профессионал таълим марказига ташриф буюрди. Бу ҳақда Бандлик ва меҳнат муносабатлари вазирлиги матбуот хизмати маълум қилди.
Вазирликлар ва уларга мансуб муассасалар ўртасида икки томонлама алоқаларни ривожлантириш, Ўзбекистон профессионал таълим марказларидаги жорий ҳолат билан танишиш ва Россия томони билан биргаликда уларни ривожлантириш истиқболларини муҳокама қилиш делегация ташрифидан кўзда тутилган асосий мақсад бўлди.
Ўзбекистон Бандлик ва меҳнат муносабатлари вазири Актам Ҳайитов Россия делегацияси билан учрашув давомида икки мамлакат ўртасида иттифоқчилик ва шериклик муносабатлари, жумладан, меҳнат бозори ва аҳоли бандлиги соҳасида сифат жиҳатдан янги босқичга кўтарилганини таъкидлади.
Тошкент профессионал таълим маркази директори Р. Ибрагимов меҳмонларни Тошкент ва Самарқанддаги марказлар фаолияти, шунингдек, Қашқадарё, Фарғона ва Хоразм вилоятларида марказлар қурилиши ҳолати билан батафсил таништирди.
Изоҳ (0)