Наманган шаҳридаги барча оилавий поликлиникаларда «Электрон поликлиника»лар фаолият кўрсата бошлади. Бу ҳақда «Дарё»га вилоят соғлиқни сақлаш бошқармаси матбуот хизмати хабар берди.
Соҳа фаолиятини замон талаби асосида такомиллаштириш имконини берадиган янгилик сентябрь ойида шаҳардаги 10-оилавий поликлиникасида татбиқ этилганди. Қисқа фурсатда Соғлиқни сақлаш вазирлигига қарашли «Ўзмединфо» маркази, вилоят ҳокимлиги компьютерлаштириш маркази ва вилоят соғлиқни сақлаш бошқармаси мутахассислари ёрдамида шаҳардаги яна 12 та поликлиника локал тармоққа уланди. Вилоят ҳокимлиги ва ҳомийларнинг молиявий ёрдамида тармоқлар тортилиб, зарур ахборот коммуникация воситалари билан таъминланди.
«Электрон поликлиника» тизими аҳолига қулайлик яратиш мақсадида ишлаб чиқилган. Дастурга мувофиқ, поликлиникалар хизмат кўрсатадиган маҳаллаларда яшовчиларга очилган тиббий карталарнинг ҳаммаси касалликларнинг халқаро таснифи шаклида Соғлиқни сақлаш вазирлиги корпоратив тармоғидаги электрон базага киритилган.
Бемор нафақат ўзи яшайдиган жойдаги поликлиника, балки республиканинг қайси бир шаҳри ёки вилоятида бўлмасин, тиббий хизматга эҳтиёж сезса, ўша ҳудуддаги бирламчи тиббий-санитария ёрдами муассасасига мурожаат қилиши мумкин. Фуқаронинг тиббий картаси мамлакатдаги барча оилавий поликлиникалар компьютерларида кўринади.
Энди беморлар оилавий поликлиникаларга келиб, навбат кутиб, вақтини беҳуда сарфламайди. Интернет тармоғи орқали шифокор қайси вақтда ишлашини билиб, электрон рўйхатга ёзилиш мумкин. Врачлар қабули чоғидаги ташхис маълумотлари эса автоматик равишда ҳисоботлар базасида қайд этиб борилади.
Фуқаролар мазкур тизим орқали шифокорлар ва ҳамшираларга миннатдорчилик изҳор қилиши, фаолиятига оид таклиф ва мулоҳазаларини баён этиши мумкин. Яна бир муҳим жиҳат шундан иборатки, «Электрон поликлиника»га келиб тушган мурожаат ёки шикоят таҳлили шифокорлар ва ўрта тиббиёт ходимларининг ишини адолатли баҳолашда қўл келади.
«Электрон поликлиника» тизими келгуси босқичда туманлардаги кўп тармоқли марказий поликлиникаларга ўрнатилади. Кейин эса қишлоқ оилавий поликлиникалари қамраб олинади. Яқин орада Норин, Мингбулоқ, Чортоқ ва Янгиқўрғон туманлари аҳолиси ҳам бу имкониятдан баҳраманд бўлади.
Изоҳ (0)