Netflix стриминг сервиси «Қартадан қурилган уй» сериалини тегажоқликлар ва жинсий зўравонликда айбланган актёр Кевин Спейси билан биргаликда суратга олмаслигини маълум қилди. Бу ҳақда Meduza хабар бермоқда.
«Агар унда Кевин Спейси қатнашадиган бўлса, Netflix ‘Қартадан қурилган уйъни ишлаб чиқариш билан шуғулланмайди. Биз бу шоу билан боғлиқ кейинги қадамларимизни баҳолаш учун MRC телекомпанияси билан ишлашни давом эттирамиз», — дейилади Netflix баёнотида.
Сервис, шунингдек, ёзувчи Гор Видаль ҳақида суратга олинаётган «Гор» фильмини чиқаришдан ҳам воз кечди. Кевин Спейси бу фильмда актёр сифатида суратга ҳам тушаётган эди, ҳам фильм продюсери эди.
Сериални яратиш устида бевосита иш олиб борувчи MRC компанияси Спейсининг тасвирга олиш майдончасидаги беадаб хулқи ҳақида пайдо бўлган ахборотдан сўнг, актёр лойиҳадан «четлатилгани»ни маълум қилди.
ОАВда сериал бош қаҳрамони ролини ижро этган актёр Кевин Спейсига нисбатан унинг тегажоқликлари ва жинсий зўравонлиги ҳақида айбловлар пайдо бўлганидан сўнг, «Қартадан қурилган уй» сериалини суратга олиш ишлари тўхтаб қолди. Актёрнинг чидаб бўлмас хулқи ҳақида, хусусан, сериални тасвирга олиш гуруҳи аъзолари ҳам айтиб ўтди. Аввалроқ сериалнинг кейинги (олтинчи) фасли лойиҳада сўнггиси бўлиши айтилган эди.
Изоҳ (0)