Warner Bros. компанияси ва Жон Роналд Руэл Толкиннинг меросхўрлари Amazon Studios билан биргаликда «Узуклар ҳукмдори» трилогияси асосида сериал суратга олиш лойиҳасини муҳокама қилмоқда. Бу ҳақда Meduza хабар бермоқда.
Variety нашрининг вазиятдан бохабар манбаларга асосланиб хабар беришича, музокараларнинг дастлабки босқичи бўлиб ўтмоқда. Хабар беришларича, Warner Bros. ва Толкиннинг меросхўрлари бу ғояни бозорнинг турли иштирокчиларига таклиф қилган, улар орасида Amazon Studios’нинг имкониятлари нисбатан юқори баҳоланмоқда.
Музокараларда Amazon раҳбари Жефф Безос ҳам қатнашмоқда. Variety’нинг қайд этишича, бу бироз ноодатий вазият бўлиб, ушбу ҳолат Amazon Studios раҳбари Рой Прайснинг тегажоқликларда айбланиб, ишдан ҳайдалгани билан боғлиқ бўлиши мумкин.
Жон Роналд Руэл Толкиннинг «Узуклар ҳукмдори» ва «Хоббит» китоблари асосида шу номлар остида иккита фильмлар трилогияси чиқарилган (улар мос равишда 2001—2003 йилларда ва 2012—2014 йилларда экранларга чиққан). Барча фильмлар янги зеландиялик режиссёр Питер Жексон томонидан суратга олинган.
Изоҳ (0)